Ndërkohë që i afrohemi fundit të sezonit turistik në vend, kryeministri Rama ka publikuar një shkrim promovues të CNN për rivierën shqiptare, i cili është pasqyruar me foto nga Ksamili. Rama shkruan në Facebook se ky sezon turistik është sezoni me mbulimin më të madh në mediat ndërkombëtare.
Klima duket mjaft pozitive dhe këtë e tregojnë shifrat më të fundit të publikuara nga Instituti i statistikave (INSTAT), ku sipas të dhënave më të fundit, rezulton se 1 milion e 403 mijë e 333 shtetas të huaj kanë vizituar vendin ton vetëm gjatë muajit korrik
Në këtë mënyrë, numri i shtetasve të huaj që kanë ardhur në vend gjatë pikut të sezonit turistik është 21.1 % më i lartë se një vit më parë.
Sipas të dhënave, në korrikun e këtij viti, nga vendet që kanë hyrjet më të larta të shtetasve në Shqipëri janë Spanja, e cila ka pasur rritjen më të madhe me 3,8 herë dhe Italia me 48,0 %, krahasuar me korrikun e vitit 2021.
Hyrjet e shtetasve shqiptarë dhe të huaj në territorin shqiptar gjatë muajit korrik të këtij viti janë mbi 2 milionë. Tregues që rezulton me një rritje 22,1 %, krahasuar me korrikun e 2021-it.
Sipas INSTAT-it, rreth 1. 3 milionë shtetas kanë deklaruar se qëllimi i ardhjes në Shqipëri është turizmi, duke përbërë kështu 97% të vizitorëve që kanë ardhur në vendin tonë gjatë korrikut.
