Po afron Botërori i Katarit. Kombëtaret pjesëmarrëse po marrin masat në çdo drejtim për t’u paraqitur sa më mirë në këtë Kupë Bote krejt të veçantë në histori, e para që do të luhet në vjeshtë-dimër. Zvicra, e cila përbëhet nga lojtarë të disa kombësive, ka edhe një merak tjetër.
Ajo lidhet kryesisht me dy liderët shqiptarë që ka në përbërje. Të dy këta u kthyen në “djaj” dhe “heronj” gjatë ndeshjes së luajtur ndaj Serbisë, në “Rusia 2018”.
Të dy shënuan gola dhe festuan me shqiponjën dykrenare.
Një simbol identifikues dhe krenaria për të gjithë shqiptarët, gjë e cila u konsiderua si provokim nga serbët. Edhe FIFA e qortoi Zvicrën dhe e gjobiti. Që kjo të mos përsëritej më, drejtuesit e Federatës Zvicerane të Futbollit zhvilluan mbledhje dhe e mbyllën këtë çështje.
Duke qenë se shorti e ka vendosur kombëtaren helvete sërish në të njëjtin grup me Serbinë në “Katar 2022”, ashtu si në Botërorin pararendës të Rusisë, drejtori i kombëtareve të Zvicrës ka kërkuar që të ndalohen të gjitha festimet e lojtarëve, që konsiderohen provokime. Ndër to, me siguri edhe festimi me shqiponjë.
Pierluigi Tami u shpreh për “Blick”: “Menjëherë pas shortit të grupeve më 1 prill 2022, ne u takuam me trajnerin e kombëtares serbe, Dragan Stojkovic. Ai na tha:
Është dëshira jonë e përbashkët që kjo ndeshje të jetë e gjitha për futbollin. Në maj të këtij viti, presidenti i Federatës Zvicerane të Futbollit, Dominique Blanc dhe sekretari i përgjithshëm Robert Breiter u takuan me homologët e tyre nga Federata Serbe e Futbollit. Gjatë bisedës, serbët përsëritën se ekipi serb duhet të merret vetëm me futbollin.
Kujtojmë se Xherdan Shaqiri është fyer nga tifozët serbë gjatë gjithë ndeshjes së vitit 2018. Tami specifikon: “Nuk duam të bëjmë më të njëjtat gabime. Ne jemi këtu për të luajtur futboll dhe asgjë tjetër. Ne nuk duam të dërgojmë asnjë mesazh politik apo fetar. Nuk duhet të ketë as fjalë, as gjeste dhe as sjellje të përgjithshme që provokojnë ndjeshmëri të tjera. Kur brohorasim, është për të treguar gëzimin tonë, kjo është e rëndësishme. Nuk duhet të jemi provokues”.
