Ish-kryeministri Sali Berisha e ka quajtur një kërcënim të ri për Ballkanin Perëndimor marrëveshjen e fundit të nënshkruar në Nju Jork, në ambientet e Asamblesë së Përgjithshme të Kombeve të Bashkuara mes Serbisë dhe Rusisë.
Ish-kryeministri Sali Berisha e cilëson si një kërcënim të ri marrëveshjen e nënshkruar në Nju Jork mes ministrit të jashtëm rus, Lavrov me homologun Selakoviç për bashkërendimin e politikës së jashtme mes Moskës dhe Beogradit. Sipas Berishës, kjo marrëveshje provon gjithashtu se Edi Rama me mbështetjen për Ballkanin e Hapur po punon për hegjemoninë ruso-serbe në rajon. “Marrëveshja Serbo- Ruse në New York është një kërcënim i ri për Ballkanin Perëndimor. Ministri i jashtëm i Putin, Sergei Lavrov pasi dështoi në udhëtimin e tij drejt Beogradit në fillim të qershorit të këtij viti, vizitë në të cilën, siç deklaroi vetë, do të shprehte mbështetjen për Ballkanin e Hapur, u takua dy ditë më parë në Selinë e OKB dhe firmosi me ministrin e jashtëm të Serbisë, Nikolla Selakoviç, Marrëveshjen për Bashkëpunimin në Politikën e Jashtme midis Moskës dhe Beogradit”, është shprehur ish- kryeministri Sali Berisha.
Sipas tij, kjo marrëveshje dëshmon qartë dhe përfundimisht se Serbia po sillet si Rusi e vogël dhe presidenti i saj Vuçiç është një Putin i vogël në Rajonin tonë.
“Marrëveshja e Beogradit me Moskën pas agresionit rus në zemër të Europës ndaj një vendi të lirë, Ukrainës, fakton se sa iluzive janë përpjekjet për të shkëputur Putinin e vogël të Serbisë nga Putini i Madh i Rusisë”, shkruan Berisha.
Ai ka dënuar me forcë këtë si një kërcënim për paqen në rajonin tonë.
“Shtoj se marrëveshja për bashkëpunim në politikën e jashtme midis Moskës dhe Beogradit provon gjithshtu se Edi Rama, ky vasal i Vuçiçit me mbështetjen e Ballkanit të Hapur po punon me përkushtim për hegjemonine ruso – serbe dhe destabilizimin e rajonit dhe kundër interesave kombëtare të shqiptarëve”, shkroi Berisha.
“Kjo marrëveshje dëshmon qartë dhe përfundimisht se Serbia po sillet si Rusi e vogël dhe presidenti i saj Vuçiç është një Putin i vogël në rajonin tonë. Duke dënuar me forcë këtë si një kërcënim për paqen në rajonin tonë, shtoj se marrëveshja për bashkëpunim në politikën e jashtme midis Moskës dhe Beogradit provon gjithashtu se Edi Rama, ky vasal i Vuçiçit me mbështetjen e Ballkanit të Hapur po punon me përkushtim për hegjemoninë ruso-serbe dhe destabilizimin e rajonit dhe kundër interesave kombëtare të shqiptarëve”, shkruan Berisha.
