Sonte në Torino Juventus do të luajë ndaj Maccabi Haifa-s, përballje e vlefshme për raundin e tretë të Grupit H të Champions League. Pasi dolën të mundur në dy ndeshjet e para kundër PSG dhe Benfica-s, bardhezinjtë nuk kanë zgjidhje tjetër veçse të fitojnë dy ndeshjet e ardhshme kundër skuadrës izraelite, dhe më pas të luajnë për gjithçka në Lisbonë.
Në çdo rast, Allegri ka opsione të ndryshme për të zgjedhur formacionin, ndërsa kolegu i tij Barak Bakhar shfaqet në Torino me probleme të mëdha. Arsyeja nuk është diçka që lidhet me dëmtimet apo skualifikimet, por me fenë. Sipas parimeve të judaizmit, në fakt, sot është dita e Yom Kipur.
Dita e pendesës është dita më solemne e vitit, kushtuar shlyerjes së mëkateve dhe pajtimit, dhe fillon në muzg të ditës së dhjetë të muajit hebre Tishri (ky vit bie në 4-5 tetor), duke vazhduar derisa të shfaqen yjet e parë të nesërmen në mbrëmje. Prandaj, kohëzgjatja mund të jetë deri në 25-26 orë.
Në këtë periudhë kohore është e ndaluar të hahet dhe të pihet, një urdhër që edhe lojtarët izraelitë e kanë ndjekur që nga muzgu i djeshëm. Një çështje që ndoshta do të ndikojë shumë në zgjedhjet stërvitore të Maccabi Haifa-s kundër Juventusit, siç e pranoi në prag edhe trajneri Bakhar: “Unë do të agjëroj dhe do ta bëjnë edhe disa lojtarë, por nuk përjashtohet që ata që agjërojnë të duan të luajnë gjithsesi.
Është një përvjetor i rëndësishëm për Judaizmin që do të përfundojë para fillimit të ndeshjes dhe ndoshta dikush do të jetë ende në gjendje të ushqehet mjaftueshëm.”Lojtarët më të mirë të ekipit, nga golashënuesi më i mirë sezonal, Atzili, te mesfushorët Lavi dhe Haziza dhe sulmuesi David, ka të ngjarë të jenë jashtë formacionit.
