Kryeministri Edi Rama ka folur në lidhje me sulmet kibernetike në shënjestër të të cilave ishte edhe vendi ynë.
Për gazetën amerikane “Politico”, Rama ka treguar se përse vendosi që si shtet anëtar i NATO të mos përdorë Nenin 5, që e trajton një sulm kundër një shteti anëtar si një “sulm kundër të gjithëve”, dhe që kërkon mbrojtje kolektive.
Kreu i qeverisë është shprehur se ka vendosur që Shqipëria të mos e ndërmarrë atë veprim, edhe pse e ka konsideruar si një “bombardim” veprimin e Iranit.
“Shqipëria vendosi të mos e ndërmerrte atë veprim. Kam shumë respekt për miqtë dhe aleatët tanë për t’u thënë atyre se çfarë duhet të bëjnë. Ne jemi gjithmonë shumë të kujdesshëm që të jemi shumë të përulur në vlerësimet tona”, tha Rama.
“Është njësoj si të bombardosh një vend, por do ishte e tepërt për ne të mendojmë dhe të arrijmë në vendimin se duhet t’i kërkojmë NATO-s të përdorë Nenin Pesë,” tha kryeministri ndër të tjera.
