Së fundmi, kudo në Turqi flitet për një projekt të fshehtë të raketave të quajtur Tayfun, që duket se ka qenë duke u zhvilluar prej disa vitesh. Mirëpo, duket se testimi i saj, ka synuar të trembë “rivalin” e Turqisë, Greqinë, pas tensioneve të njëpasnjëshme.
Megjithatë, duket se pa sukses…
Përfaqësuesi i qeverisë greke Janis Economou deklaroi gjatë ditës së sotme se “sado që presidenti turk Recep Tayip Erdogan dhe lidershipi turk përpiqen që me propagandë e kërcënime të panikojnë e tmerrojnë, Greqia mbetet një faktor stabiliteti dhe se “ajo mbetet e vendosur në çështjet që lidhen me sovranitetin kombëtar”.
Economou iu referua kërcënimeve të presidentit turk dhe shtoi se të gjithë e kuptojnë se “pretendimet e tij janë të pabaza dhe johistorike.”
“Ne nuk provokojmë. Ne jemi faktor stabiliteti dhe paqeje, por jemi absolutisht të palëkundur në çështjet e sovranitetit kombëtar dhe jemi absolutisht të aftë të menaxhojmë çdo kërcënim në mënyrë efektive”, tha ai.
Kujtojmë se presidenti turk, duke folur për raketën balistike Tayfun që Turqia testoi ditët e kaluara, tha dje se “Turqia po forcon sistemet e mbrojtjes ajrore, raketat, të blinduara…” Lideri turk tha se Turqia po përpiqet të kalojë në një nivel tjetër, me risitë teknologjike, duke i treguar botës guximin dhe vendosmërinë e tyre.
