Zvicra e ka nisur për mrekulli Kampionatin Botëror ‘Katar 2022’, ku ka marrë fitoren e parë.
Përfaqësuesja e Zvicrës në ndeshjen e tyre hapëse kanë mposhtur Kamerunin me rezultat minimal 1-0.
Në fakt më mirë ndeshjen e nisën mysafirët ku krijuan dy raste të mira brenda një aksioni për gol, por pa arritur ta dërgonin topin në rrjetë.
Fillimisht sulmuesi Bryan Muembo goditi direkt në duart e Sommer, derisa nga topi i kthyer u godit nga Toko Ekambi por topi shkoi mbi portë.
Gjithsesi në 45 minutat e para gola nuk pati dhe dy skuadrat shkuan në pushim me rezultat të pastër 0-0.
E pjesa e dytë nisi për mrekulli për Zvicrën, ku në minutën e 48-të gjetën golin.
Ylli nga Kosova, Xherdan Shaqiri bëri një asistim fantastik për Breel Embolon, i cili u gjend bukur në zonë dhe realizoi nga afërsia për 1-0.
Deri në fund të ndeshjes, dy skuadrat krijuan edhe disa raste të mira shënimi, por gola më nuk pati dhe Zvicra mori tre pikët e para në Botëror.
Dy futbollistët nga Kosova, Granit Xhaka e Xherdan Shaqiri luajtën titullar në këtë sfidë, derisa ky i fundit u qëndroi në fushë për 72 minuta, ndërkohë Xhaka luajti një ndeshje të plotë. Në bankën rezervë ishte mesfushori tjetër shqiptar Ardon Jashari.
Aktualisht helvetikët janë lider në Grupin G me tre pikë, derisa pritet të zhvillohet në mbrëmje ndeshja Brazil – Serbi.
Ndeshjen e ardhshme Zvicra e zhvillon me Brazilin pas katër ditësh, ndërsa Kameruni përballet me Serbinë.
