Brazili bëri përshtypje. Dihej se ishte një nga kandidatët për suksesin përfundimtar në “Katar 2022”. Ndaj Serbisë, një skuadër zakonisht e vështirë e plot kampionë, kombëtarja e Tite bëri një lojë perfekte dhe falë dy golave të Richarlison e nisi me sukses Botërorin.
Pas ndeshjes, përveç ekzaltimit për sulmuesin e Tottenhamit dhe shqetësimit për kushtet e Neymar e Danilo, dy shtylla, pati kohë edhe për një përgjigje kontroverse nga Thiago Silva ndaj trajnerit serb. Stojkovic, në prag të ndeshjes kishte thënë diçka që ish-lojtari i Milanit e kishte mbajtur “vëth në vesh”.
Trajneri i Serbisë, Dragan Stojkovic, duke folur për Brazilin dhe njësinë sulmuese të klasit të parë në dispozicion të Tite, me gjysmë shaka tha: “Ata luajnë me katër sulmues? A kanë mbrojtës?”
Ndoshta ishte një shaka, ose ndoshta një provokim i vogël, ne nuk e dimë.
Sidoqoftë, këto fjalë mbërritën në kampin stërvitor të kombëtares braziliane dhe kapiteni Thiago Silva reagoi, pas ndeshjes. Mbrojtësi i Chelsea doli para mikrofonave televizivë, ku komentoi suksesin e qartë dhe fillimin e shkëlqyer të Botërorit.
Aty iu përgjigj edhe Stojkoviçit, shenjë se ato fjalë e kishin goditur jo pak: “Trajneri i Serbisë tha se ne luajmë me katër sulmues dhe pyeti nëse Brazili ka dikë prapa për të mbrojtur. Kjo nuk ishte e mirë, ai nuk na respektoi.
Ne mbrojtësit brazilianë kemi një histori. Unë kam bërë histori në futboll, po kështu Marquinhos, Danilo, Alex Sandro. Edhe Alisson, gjithashtu. Për mendimin tim, ky trajner duhet të ketë më shumë informacion për kundërshtarët e tij. Të mos llapë (flasë) kot së koti”.
Në parim, mbrojtësi brazilian nuk mund të fajësohet nëse marrim parasysh “palmaresin” e të gjithë mbrojtësve të “Selecao”. Të pesë lojtarët (përfshirë portierin) kanë fituar shumë dhe të paktën kanë luajtur në një finale të Champions League, tre prej tyre e kanë fituar gjithashtu.
Përgjigja e Thiago Silva, një lojtar zakonisht korrekt dhe asnjëherë argumentues, tregon më tej se sa i përqendruar është Brazili, i cili po e ndjek titullin me të gjitha forcat, titull që i mungon prej 20 vitesh.
