Ndërsa Leo Messi dhe Kylian Mbappè janë gati të luajnë finalen e Botërorit të Katarit, musketieri i tretë i PSG-së, Neymar, ndodhet me pushime në Brazil. Ai i është përkushtuar organizimit të festave, krijimit të “kaosit” dhe futjes në telashe.
“Marifeti” i 10 së “Selecao” ka zemëruar një pjesë të opinionit publik brazilian, i cili ende mban zi për eliminimin në çerekfinale të Kupës së Botës nga Kroacia. Në fakt, Neymar organizoi një festë në vilën e motrës së tij Rafaella, ku morën pjesë shumë të famshëm. Modelet ishin aty, disa të fotografuara përkrah lojtarëve të tjerë që morën pjesë në “Katar 2022”, si anësori i Manchester United, Antony.
Dhe të mendosh që në rrjetet sociale, pas nokautit të Brazilit, Neymar kishte shkruar: “Jam i shkatërruar psikologjikisht”. Botërorin e Katarit e kishte konsideruar dështimin më të keq të gjithë karrierës së tij. Faktet tregojnë për “lot krokodili”, me sa duket, nga ana e kampionit, i cili gjithmonë u përpoq të mbronte edhe trajnerin Tite dhe tha se do të marrë pak kohë për të reflektuar mbi të ardhmen e tij në kombëtare.
Por më pas erdhi festa dhe, me kalimin e orëve, kritikat shtoheshin. “Folha de Sao Paulo” ka shkruar: “Duket se zemërimi i tij u zhduk në festën që zhvilloi së bashku me kolegët, modelet dhe shumë argëtim”. Ish-futbollisti Neto, idhulli i Corinthians dhe tani prezantues televiziv, u shpreh veçanërisht i ashpër:
“Të gjithë kanë të drejtë të organizojnë festa, por nëse shkatërrohen psikologjikisht nuk do të të jenë pranë për festa”. Duke shtuar: “Neymar ka respekt për popullin brazilian”. Dhe përsëri: “A e ka parë dikush Cristiano Ronaldon të festojë pas eliminimit? A e ka parë dikush De Bruyne? Ajo që pamë në Kupën e Botës ishte një turp”.
Për të mbyllur serinë e opinioneve, Walter Casagrande Junior, ish-futbollist i Corinthians dhe tani komentues i portalit “Uol”: “Nuk është e mundur që të ketë ende njerëz, të cilët mendojnë se Neymar mund të ndihmojë në procesin e rithemelimit të Selecao. Ndihma e tij e vërtetë do të ishte të qëndronte larg futbollistëve të rinj brazilianë për të mos i kontaminuar ata me idetë dhe sjelljen e tij”.
