Zëvendëskryeministrja Belinda Balluku zhvilloi një takim sot me përfaqësues nga një serë kompanish dhe institucionesh financiare ndërkombëtare, të interesuara për ndërtimin e portit tregtar në Porto Romano.
Balluku tha se ky është një projekt dhe investim strategjik për vendin dhe rajonin. Sipas ministres porti i ri në Porto Romano, nuk do t’i shërbejë vetëm Shqipërisë, por edhe Kosovës dhe Maqedonisë së Veriut.
“Porti i porti Romanos nuk do t’i shërbeje vetëm Shqipërisë, por në momentet që sot flasim, flasim me dy marrëveshje zyrtare të lidhura mes qeverisë shqiptare, Maqedonisë së Veriut dhe asaj të Kosovës, për ngritjen e dy porteve të thata, respektivisht në Strugë dhe në Prishtinë.
Ne jemi të hapur për marrëveshje me vendet e Ballkanit Perëndimor. Kemi nisur prej disa vitesh bashkëpunimin për rrjetin tonë hekurudhor, që do të jetë një instrument mbështetës. Porti i ri i Durrësit në Porto Romano, një investim i ri dhe ambicioz. Porti aktual i Durrësit nuk merr notën kaluese në kushtet që jemi sot. Hekurudha Tiranë-Durrës do të lidhet me korridorin e tetë. Do të ketë një bazë autonome detare që aspirojnë në NATO, kemi bërë prezantimin tonë atje. Numri i shumtë i vizitorëve tregon interesin e lartë për këtë projekt. Është hera e parë që një projekt i tillë po ndahet me kompani të mëdha ndërkombëtare.”, u shpreh Balluku.
