Një skandal ka përfshirë Turqinë, në lidhje me donacionet për viktimat e prekura nga tërmeti shkatërrimtar.
Policia turke ka arrestuar 78 persona për shkak se kanë bërë postime në rrjetet sociale, duke hapur llogari dhe duke pretenduar se po mblidhnin fonde për t ndihmuar të prekurit nga tërmeti. Por në fakt fondet e mbledhura nuk shkonin kurrë tek njerëzit e prekur.
Numri i të vdekurve në Turqi dhe Siri nga tërmeti shkatërrues ka kaluar mbi 41,000 dhe miliona njerëz kanë nevojë për ndihmë humanitare. Drejtoria e Përgjithshme e Sigurisë së Turqisë tha se ka identifikuar 613 persona për postime provokuese dhe kanë nisur procedimet ligjore kundër 293 prej tyre.
Nga ky grup, kryeprokurori urdhëroi arrestimin e 78 personave. Drejtoria shtoi se 46 faqe interneti u mbyllën për përdorimin e “spam phishing” në përpjekje për të vjedhur donacione për viktimat e tërmetit dhe se ata mbyllën 15 llogari të mediave sociale që hiqeshin si institucione zyrtare.
