Joan Laporta e ka të qartë se Xavi Hernandez duhet të vazhdojë në krye të Barcelonës. Presidenti “blaugrana” nuk e ka fshehur dëshirën për të rinovuar me trajnerin katalanas pa pritur fundin e sezonit.
Përtej titujve të mundshëm që mund të fitojë skuadra, Laporta e konsideron ish-mesfushorin si personin ideal për të drejtuar ekipin.
“Jam gati të rinovoj me Xavi edhe nëse nuk fitohet LaLiga. I kam thënë dhe ai këmbëngul që, nëse nuk fitojmë… dua të përcjell një mesazh qetësie. Tashmë kam menduar për rinovimin. Ai e njeh mirë situatën në shtëpi dhe mbron këtë stil të lojës që kemi te Barça. Nuk na shtyn t’i shtrijmë krahët më shumë se mëngët, e kupton situatën e klubit”, shpjegoi Joan Laporta.
Nuk duhet të harrojmë se Xavi luajti ndeshjen e tij të 50-të në La Liga si trajner në Valencia, duke bërë histori. Katalanasi ka arritur 37 fitore dhe 118 pikë dhe këto shifra e bëjnë trajnerin e dytë më të mirë në historinë e Barçës në këto pesëdhjetë ndeshjet e para.
Për të ardhmen e Busquets, Laporta ka shpjeguar se ka folur me mesfushorin dhe fillimisht kërkon të dijë qëllimet e tij. Ideja është që të propozohet edhe një vit. Në fakt, presidenti ka shpjeguar se lojtarët që mbarojnë kontratën dhe kanë një moshë të caktuar do t’i vazhdojnë sezon pas sezoni.
