Ish-kryeministri Sali Berisha ka prezantuar pasditen e kësaj të marte Lefter Maliqin, si kandidat i koalicionit që ai ka me Ilir Metën, për Bashkinë e Kuçovës. Berisha ka folur me superlativa për të, duke e konsideruar si një ndër qeveritarët vendorë më të përkushtuar të Shqipërisë.
“Ky entuziazëm, kjo energji është burim i fuqishëm frymëzimi, është burim i fuqishëm shprese, për banorët e Kuçovës dhe mbarë shqiptarët që në datën 14 maj të votojnë kandidatin e koalicionit ‘Bashkë Fitojmë’, Lefter Maliqin, njërin nga qeveritarët vendorë më të përkushtuar të këtij vendi.
Një bir të këtyre trevave, që pushtetin që i dhanë ju, e përdori për transformime, ndryshime, përmirësim të jetës tuaj, të kushteve tuaja, të punës tuaj në tërësi.
Komunat në të cilat qeverisi Lefter Maliqi, pësuan ndryshime më thelbësore se shumë e shumë rajone e komuna të tjera të vendit, dëshmi kjo e përkushtimit, por edhe e ndershmërisë, transparencës, vizionit, dashurisë së tij për të ndryshuar çdo ditë realitetin ku jetoni”, u shpreh Sali Berisha.
