Një burrë i cili ishte braktisur në një kosh kur ishte foshnjë, ka takuar gjysmë vëllanë e tij falë një emisioni që transmetohet në Angli, që ka në thelb bashkimin e familjarëve dhe gjetjen e njerëzve të humbur.
Së fundmi ky emision u fokusua tek Paul Connolly, i cili lindi në lindje të Londrës në vitin 1962. Nëna e tij pas një sërë problemesh e braktisi kur ai ishte vetëm disa javësh. Një fqinj dëgjoi të qarat e tij dhe thirri shërbimet sociale.
Gjatë emisionit, Paul tha se ai kishte qenë në kërkim të familjes së babait të tij, pasi provoi të kishte kontakte me të afërmit irlandezë të nënës së tij.
Por shikuesit u habitën kur u zbulua se jo vetëm që Paul kishte një gjysmë vëlla nga babai, Frankie Peroni, por djemtë kishin ndjekur pa e ditur të njëjtën shkollë në Essex, në të njëjtën kohë.
Përmes testit të ADN-së Paul zbuloi se ishte gjysmë maltez dhe zbuloi për ekzistencën e vëllait të tij. Paul dhe Frankie u ribashkuan mes shumë emocionesh.
“Sigurisht që ne e kemi gjetur njëri-tjetrin shumë vonë, por mendoj se duhet të jemi mirënjohës çdo ditë. Fillova të kërkoja babanë tim dhe në vend të kësaj gjeta një vëlla”, tha ai para kamerave.
Paul pati një fëmijëri të vështirë pasi u braktis nga nëna e tij dhe në moshën tetë vjeç u dërgua në shtëpinë e fëmijëve të St. Leonard në Hornchurch, Essex, ku tha se duroi shumë “tortura mendore” dhe “rrahje fizike”.
“Fjeta nën krevat. Rehatia ime ishte një thikë kuzhine me një dorezë druri, e mbajta atë për të qëndruar gjallë,” kujton ai.
Ai zbuloi se babai i tij ishte një pronar dyqani i quajtur Philip Psaila, i njohur gjithashtu si Pino, i cili fatkeqësisht vdiq në vitin 1968.
Paul tha se kishte kontakte të kufizuara me nënën e tij biologjike dhe tha se “ajo ishte e turpëruar që unë isha një fëmijë i paligjshëm”.
“Ajo kishte një edukim të vështirë dhe duhej të bënte atë që duhej të bënte për të mbijetuar. Ndoshta ishte gjëja më e mirë që ajo mund të kishte bërë me të vërtetë , “tha ai.
