Përtej informacionit të përhapur për atë se çka është në vetvete virusi Covid-19, këto janë ditë që duhen të shoqërohen me aktivitete përmbushëse, qoftë dhe në shtëpi ku përkohësisht po qendron pjesa më e madhe e qytetarëve.
Në një komunim në distancë me “Fjala”, psikologia e këshillimit, Valentina Telhaj, ofron disa teknika për të shmangur stresin e panevojshëm. Ajo i mëshon studimeve, se rreth 80% e sëmundjeve të rënda mund të përkeqësohen pikërisht nga stresi. Kësisoj, rendit si antidote aktivitetet fizike, librat dhe muzikën ritmike.
*****
Përjetimi i stresit mund të jetë shumë personal, mund të krijohet nga një situatë afatshkurtër ose afatgjatë, por edhe nga një përvojë e pakëndshme. Trauma akute është reagim afatshkurtër i trupit pas ngjarjes traumatike. Trauma kronike, reagim i vazhdueshëm dhe i zgjatur në kohë ndaj një ngjarjeje traumatike të përsëritur. Sa i takon traumave komplekse, janë reagim i vazhdueshëm ndaj disa ngjarjeve traumatike të përsëritura, që shoqërohen me pasoja shumë të rënda në shëndetin mendor dhe në funksionin normal të individit.
Pasojat më të zakonshme të një ngjarjeje traumatike janë ato fiziologjike, emocionale dhe psikologjike. Fizikisht, personat e traumatizuar mund të vuajnë nga trembja lehtësisht, rritje të shpeshta të rrahjeve të zemrës, lodhje kronike, axhitim, tension muskulor, etj. Në rrafshin emocional dhe mendor, vështirësi përqëndrimi, pagjumësi dhe makthe, flashback të ngjarjes, mungesë besimi dhe dyshueshmëri, ndjenja e pafuqisë, ndjenja faji, turpi, mungesë shprese.
Ja disa teknika për të shmangur stresin e panevojshëm:
1) Programoni kohën. Programimi dhe organizimi i kohës suaj mund t’ju bëjë më shumë produktiv dhe efektiv
2) Reduktoni gjërat që nuk ju japin pozitivitet
3) Krijoni një stil jetese duke balancuar detyrimet me përgjegjësitë
4) Ushqehuni mirë, mos pini cigare dhe limitoni sa të mundeni konsumin e alkoolit
5) Mbani kontakte virtuale me të afërmit dhe miqtë, kryesisht me ata që janë shumë të aftë të përballojnë ndryshimet e jetës
6) Ndryshoni mënyrën e të menduarit, çdo mendim negativ zëvendësojeni me një pozitiv
7) Zgjidhni problemet duke punuar dhe krijuar strategji të ndryshme, derisa të arrini qëllimet tuaja
8) Bëni aktivitete fizike në shtëpi me muzikë ritmike në sfond
9) Kujtoni evente dhe ngjarje pozitive që kanë ndodhur në jetën tuaj
10) Lexoni sa më shumë libra
