UNESCO rekomandon përfshirjen e Venecias në listën e vendeve të trashëgimisë botërore në rrezik. Mediat vendase shkruajnë se për zbatimin e këtij rekomandimi do të duhet të votohet në shtator nga shtetet anëtare të organit të OKB-së.
Në vëzhgimin e Qendrës së Trashëgimisë Botërore thuhet se zhvillimi i vazhdueshëm i qytetit, ndikimet e ndryshimeve klimatike dhe turizmit masiv rrezikojnë të shkaktojnë ndryshime të pakthyeshme në vlerën e jashtëzakonshme universale të Venecias.
Raporti i UNESCO-s thotë se autoritetet italiane kanë pasur mungesë të vizionit strategjik për të zgjidhur problemet me të cilat përballet një nga qytetet më piktoreske të Italisë. Kjo është një goditje për autoritetet, të cilët akuzohen se nuk mbrojnë qytetin historik dhe lagunën përreth.
Futja e Venecias në listën e rrezikut ishte propozuar nga UNESCO rreth 2 vite më parë, por u shmang në momentin e fundit për shkak të disa masave emergjente të miratuara nga qeveria italiane.
