Denisa Daka
Përcjellja e lajmeve trishtuese dhe bilancit tragjik të vdekjeve orë pas ore nga gazetarë, politikanë e shumë miq të Facebook-ut, është kthyer në një makth tashmë. Një panoramë e tillë veç shton ankthin e panikun, e nuk sjell asnjë dobi, e kundërta ndodh.
Ndalni ju lutem përcjelljen e lajmeve të tilla, ndryshe numri i viktimave paskësaj nga sulmi i panikut, do të jetë disa herë më i lartë se i COVID-19.
Përcillni në mundni e kudoqofshi lajme që ngjallin shpresë e besim, duke ia lënë rradhën mjekëve të na informojnë për gjithçka po ndodh sot!
Kjo stuhi nuk mund të na bëjë copë e çikë arsyen, kurrsesi duke vërejtur tërë kohën një barkë që po mbytet.
Na duhet të mbijetojmë!
E sotmja është vetëm një ditë, ndërsa ajo që do të ndodhë më pas do të varet pashmangshmërisht nga mënyra se si ne do të administrojmë forcat, shëndetin tonë mendor posaçërisht!
Nëse jemi të fortë, forca do të flasë vetë, e nëse jemi të dobët, fjalët nuk do të na ndihmojnë dot.
Ilaçi më i mirë është gjithnjë i hidhur, por efekti është i duhuri në çdo rast.
Ka gjithmonë një kohë për të luftuar e një tjetër për të qenë zgjuar!
Një gazetar e një politikan i mirë, e kupton mirë gjithë këtë.
Unë refuzoj t’i shoh këto lajme e do të refuzoj t’i shoh deri në fund, fëmijët e mi gjithashtu.
Nuk besoj të ndërgjegjësohem prej tyre.
Mendoni në kini Zot sa herë orvateni të përcillni një lajm të trishtë, që këto lajme po sjellin panik e frikë te fëmijët tanë posaçërisht, e mesazhi që ato përcjellin, do të godasë shpresën e besimin e secilit për të vijuar udhën më tej.
E më të rrezikuarit nga kjo pakujdesi janë ata vetë, fëmijët tanë.
Mënyra e të raportuarit të lajmit duhet të ndryshojë sa më parë.
Më shumë se kurrë kemi nevojë sot për një gazetari korrekte e profesionale e qytetarë të përgjegjshëm, që kuptojnë siç duhet rëndësinë e fjalës e veprimeve të tyre.
Le të flasin mjekët sot!
Është radha e tyre!
