Më shumë se gjysmë milioni britanikë po shërbejnë si vullnetarë për të ndihmuar Shërbimin Kombëtar Shëndetësor për të përballuar epideminë e koronavirusit.
Po kështu në mbarë botën njerëzit po kontribuojnë për të ndihmuar ata që kanë më shumë nevojë, duke ndezur shpresën se shoqëritë mund ta kapërcejnë situatën e vështirë që ka shkaktuar virusi.
Një sallë e madhe në një ekspozitë në Londër, që do të shërbejë si spital për trajtimin e personave të prekur nga koronavirusi është ndërtuar me ndihmën e ushtrisë britanike. Spitali pritet të hapet javën e ardhshme.
Ndërsa vendi përgatitet për t’u përballur me nivelin më të lartë të epidemisë, brenda vetëm 24 orëve, më shumë se gjysmë milioni britanikë u regjistruan për të ndihmuar Shërbimin Kombëtar Shëndetësor. Mes tyre edhe Amirah Gajia, e cila ka mbyllur kafenenë e saj në Londër e po përgatitet të ndihmojë ata që janë në vijën e parë të “frontit”.
“Mendoj se kam parë më të mirën e njerëzimit në këto momente tejet të tmerrshme. Të gjithë përpiqen të mbështesin e ndihmojnë njëri-tjetrin”, thotë ajo.
Kryeministri britanik, i cili është vetë i prekur nga koronavirusi, vlerësoi rolin e vullnetarëve.
“Ata do të çojnë ilaçe nga farmacitë tek pacientët. Do t’i marrin pacientët nga spitalet e t’i çojnë në shtëpi. Ç’ka është më e rëndësishme, ata do të bëjnë telefonata të rregullta për të kontrolluar dhe mbështetur ata njerëz që jetojnë vetëm”.
Qeveria britanike është kritikuar se e vonoi të paktën deri këtë javë, marrjen e një vendimi për një izolim mbarëkombëtar.
“Gjërat e duhura bëhen në kohën e duhur. Çdo vendim lidhet me përpjekjet për të kuptuar gjithashtu se si po zhvillohen teknologjitë e ndryshme, koha që duhet, prodhimi i antiviruseve, vaksinave etj dhe se si mund të vihen në përdorim në mënyrë më efektive sapo të jenë gati. Nuk mendoj se dikush e di përgjigjen e duhur”, thotë Kalipso Chalkidou, Profesore e Shëndetit, në Kolegjin Perandorak të Londrës
Derisa të gjendet përgjigja, vullnetarët në të gjithë botën po japin kontributin e tyre. Në kryeqytetin e Gjeorgjisë, Tblisi, shoqatat bamirëse po shërbejnë për shpërndarjen e vakteve të ngrohta për njerëzit në nevojë.
Në Nairobi, vullnetarët kontrollojnë të moshuarit dhe përhapin informacione për parandalimin e infeksionit.
Në Poloni, një numër i madh njerëzish janë grupuar në mediat sociale për të ndihmuar me gjithçka, nga blerja e ushqimeve tek kujdesi për qentë.
“E krijova këtë grup për miqtë e mi dhe miqtë e miqve të mi, me shpresën se do të shfaqen gjashtëdhjetë vetë, por u ofruan mbi shtatëmbëdhjetë mijë”, thotë Marta Li, grupi “Duart e dukshme”.
Në Itali, kishat po ndihmojnë për të ushqyer të moshuarit, të sëmurët e njerëzit në nevojë.
“Në një situatë krize si kjo që po jetojmë të gjithë, të varfërit janë ata që vuajnë më shumë”, thotë At Ciro.
Si pasojë e COVID-19 një e katërta e popullsisë së botës është detyruar të izolohet. Në shumë vende, njerëzit kanë dhuruar duartrokitje çdo natë prej verandave e ballkoneve të tyre për punonjësit e shëndetësisë të cilët shërbejnë në ballë të krizës. Me qindra mijëra po japin ndihmën e tyre, një demonstrim force, në një kohë të vështirë.
