Ditët e ciklit të paguhen nga shteti/ Braçe: Si mund të punojnë gratë 8 orë në fasoneri?

Deputeti socialist Erion Braçe ka propozuar që vajzave dhe grave t’u njihen ditët e ciklit menstrual si sëmundje dhe të kenë mundësi të marrin pushim që t’iu paguhet nga buxheti i shtetit. Braçe ka bërë një tjetër reagim, por kësaj herë i është përgjigjur mjekeve të cilat kanë folur mbi këtë propozim të tij. Deputeti thotë se nuk ka thënë asnjëherë se ditët e ciklit janë vdekjeprurëse për një vajzë apo grua, por shqetësimi i tij lidhet me gjendjen shëndetësore të tyre.

“Po dëgjoj më shumë vëmendje dhe respekt opinion e mjekëve janë thuajse gjitha zonja ato që kanë folur për propozimet e mia për vajzat dhe gratë. Skam thënë kurrë që cikli menstrual te gratë dhe vajzat është vdekjeprurës, se kam thënë. Ai që ka qenë shqetësimi im ka të bëjë me gjendjen shëndetësore, sociale pikërisht gjatë kësaj periudhe te gratë dhe vajzat”, thotë Braçe.

Ligjvënësi socialist ngre një pyetje, se si mund të punojnë vajzat në ditët e ciklit, të ulura për orë me radhë në fasoneri, makina qepëse apo në shërbimin bankar, në atë gjendje shëndetësore? Një tjetër pyetje që ngre Braçe është se si mund të rrijë një vajzë 16-vjeçare në shkollë në ditët e ciklit dhe të mbajë shënime e të përqendrohet në mësim?

“Kam një pyetje për të gjitha doktoreshat që kanë folur këto ditë. A mundet që një vajze 17, 18, 19, 20, 21, 25 vjeç apo më shumë, në ditën akute të ciklit të rrijë 8, 9, 10 orë ulur në një fasoneri, mbi një makine qepëse tekstilesh, këpucësh, çantash etj? Si thoni rri? Po një vajzë e vogël, 16 apo 17 vjeç, a mundet të rrijë 5 apo 6 orë ulur në bankën e shkollës, të mbajë shënime, e të përgjigjet për procesin mësimor. A mundet që një grua tjetër të rrijë 6,7, 8 orë të ulur në sportelin e një banke për të shërbyer tamam në atë moment”, shprehet Braçe.

Braçe thotë se ka kërkuar vetëm 1 apo dy ditë pushim që mund t’ua japin vajzave dhe grave gjatë ditëve të ciklit, duke thënë se është nisur duke parë se çfarë po ndodh, që vajzat detyrohen të marrin leje në punë gjatë ciklit në ato kompani që tregohen mirëkuptuese, por në fund u mbajnë paratë nga paga. Prandaj, Erion Braçe propozohen që këto ditë t’u paguhen nga buxheti i shtetit. Madje ai bën edhe një krahasim me festat se edhe kur bien në fundjave u shtohet pushimi të hënën, duke thënë se përse mos t’ua japin edhe vajzave ditët e pushimit për arsye shëndetësore.

“Nëse kam kërkuar 1 apo 2 ditë pushim të paguar jam nisur nga ajo që po ndodh. Sot një pjesë e konsiderueshme e vajzave dhe grave nuk shkojnë as në shkollë as në punë në periudhën e ciklit. Ju paguhet? Jo. Edhe atje në ato kompani që ka mirëkuptim, edhe atje ua mbajnë nga rroga e tyre ditën e pushimit. Kur u japim të gjithëve ditë pushimi se dita e festës bie të shtunë e të dielë dhe shtohet edhe një ditë më tepër, pse mos tua japim për arsye shëndetësore”, vijon deputeti socialist.

Në fund, Braçe e mbyll duke thënë se kemi mundësinë që t’i trajtojmë vajzat dhe gratë ndryshe.

“Shikoni, këto historitë “hajde, boll u përkëdhele, mëso, puno se s’ke gjë, ec aty”, ndodhin më, ndodhin, nuk e diskutoj. Por e kemi mundësinë ti trajtojmë vajzat e gratë ndryshe”, përfundon Braçe./E.T