Nga Nikoleta Kovaçi/
Emri i Ramicës u bë i njohur kur nga Vlora në drejtim të Italisë niseshin avionë të ngarkuar me kanabis. Lënda grumbullohej nëpër fshatrat e bregut e shkonte deri në Sevaster, duke marrë thuajse gjithë sasinë që ishte e kultivuar. E ndërkohë që policia dokumentonte raste të ndryshme që lidheshin më trafikim në rrugë tokësore, avionët e drogës kalonin qetësisht ditëve të diela në mëngjes për tu zbrazur në Itali.
Po aso kohe, policia mbërriti për kontroll në një banesë të një familjeje në Ramicë. Aty gjeti një sasi prej afro 30 kg kanabis. Personat që u gjenden aty thanë se nuk kishin dijeni, ndërkohë që policia tha se personi që dyshohet që i përkiste droga kishte ikur në drejtim të paditur. Inton Adem Veshaj është arrestuar sot. Ai është gjendur në banesë me familjen e tij, ndërkohë që të dhënat flasin se ai ishte në kërkim për trafik droge pasi gjykata e ka dënuar me 4.4 vite burgim.
Njoftimi policia
“Kapet dhe ndalohet një shtetas i shpallur në kërkim kombëtar, i dënuar nga Gjykata e Shkallës së Parë, për veprimtari kriminale në fushën e narkotikëve. Policia e Vlorës, krahas punës për kontrollin e zbatimit të masave kufizuese për mospërhapjen e COVID-19, vijon punën e pandërprerë, për parandalimin dhe goditjen e paligjshmërie në fusha të ndryshme dhe si rezultat ka bërë të mundur realizimin e operacionit “Ramica”.
Në kuadër të këtij operacioni, bazuar në informacione të marra në rrugë operative, u bë kapja e shtetasit në kërkim kombëtar Inton Veshaj, 49 vjeç, në banesën e tij, në fshatin Ramicë të Vlorës. Gjykata e Shkallës së Parë Vlorë e ka dënuar 49-vjeçarin, me 4 vite e 4 muaj burgim, për veprën penale “Prodhimi dhe shitja e narkotikëve”. Ngjarja i përket muajit shkurt të vitit 2017, ku gjatë kontrollit në banesën e këtij shtetasi është gjetur një sasi lënde narkotike e llojit cannabis sativa”.
Shkurt 2017
“U referuan materialet në Prokurorinë e Rrethit Gjyqësor Vlorë, për një 46 vjeçar, banues në fshatin Ramicë, pasi në banesë, iu gjet dhe bllokua 29 kg e 700 gr lëndë narkotike e llojit Cannabis Sativa. Punohet për kapjen e tij”. Në buletinin e ministrisë së Brendshme, në të cilin rënditeshin operacionet e policisë, në rastin e fundit të muajit shkurt të atij viti shkruhet edh epër këtë rast, por pa emër dhe as ndonjë familje konkrete.
Në fakt, në atë kohë, Italia solli në Tiranë listën me një mori emrash të cilët kërkonin t`i arrestonin konkretisht për trafikun e drogës me avionë nga Vlora në drejtim të tyre. Në fakt u ndërhy dhe u vunë në pranga një numër i madh personash që lidheshin me urdhër-arrestet e italianëve ndërsa sipas të dhënave të asaj kohe disa persona i përkisnin edhe fshatit Ramicë.
