Rreth 50 mijë biznese të vogla aplikuan për të përfituar nga Qeveria pagën minimale prej 260 mijë lekësh, por 36 mijë prej tyre janë refuzuar, ndërkohë që kryeministri Rama ka premtuar një paketë të dytë ndihmash.
Kjo situatë ka krijuar kosto të madhe për shumë biznese të vogla, të cilat janë kryesisht familjare dhe janë burimi i vetëm financimi për mijëra shqiptarë. Por ato që po goditen fort nga kriza janë bizneset e reja të vogla, që janë hapur në muajt e parë të 2020-ës. Sikur të mos mjaftojë lufta me koronavirusin, këto biznese po përballen edhe me gjobat e Tatimeve.
Mbi 5 mijë biznese hapen mesatarisht çdo 3 muaj në Shqipëri (kryesisht biznese të vogla). Për bizneset e hapura në muajin janar, shkurt dhe mars pezullimi i aktivitetit po krijon vështirësi të mëdha pasi pronarët nuk kanë mundur të marrin mbrapsht as minimalen e kostos së investimit.
Në Fjala.al ka mbërritur një denoncim i një qytetari, i cili ka hapur në muajin janar një biznes të shitjeve me pakicë të veshjeve dhe në mes të muajit mars është detyruar të pezullojë aktivitetin për shkak të COVID-19.
Aplikimit të tij për të përfituar ndihmën prej 260 mijë lekësh, drejtoria e Tatimeve i ka dhënë përgjigje negative me pretendimin se biznesi nuk ka paguar asnjë taksë përgjatë vitit 2019, ndërkohë që ky biznes është hapur në janar të 2020-ës.
Por refuzimi është vetëm njëra prej goditjeve që ka marrë ky biznes nga autoritetet, pasi në fund të muajit mars është gjobitur me 5 mijë lekë për shkak se nuk kishte paguar sigurimet shoqërore. Afati për të paguar sigurimet ishte 20 mars, ndërkohë që biznesi ishte mbyllur prej më shumë se një javë në kuadër të masave të izolimit të ndërmarra nga Qeveria.
Tatimet nuk kanë hezituar të vendosin gjobën edhe pse biznesi ka qenë i mbyllur.
Në të situatë të ngjashme janë edhe shumë biznese të tjera të cilave u është refuzuar ndihma, shpesh here u duhet të paguajnë qiratë për most ë hapur konflikte në të ardhmen, dhe nga ana tjetër duhet të paguajnë gjobat e atyre institucioneve që pretendojnë se vijojnë normalisht punën në kohë lufte.
