Prokuroria ka vendosur të pushojë kallëzimin e bërë nga opozita për ish-kryeprokuroren e përkohshme Arta Marku.
Ky vendim për pushimin e çështjes do të shqyrtohet nga gjykata ditën e sotme nga gjyqtari paraprak Ardian Kalia.
Arta Marku u kallëzua penalisht nga opozita për shpërdorim detyre, veçanërisht në rastin e hetimit të ish-ministrit të Brendshëm Saimir Tahiri.
Kallëzimi i depozituar në Prokurori mban firmën e ish-krerëve të Grupeve Parlamentare të PD-së dhe LSI, konkretisht Edmond Spaho dhe Petrit Vasili.
Sipas pretendimeve të opozitës, të krerëve të grupeve parlamentare PD-LSI, përkatësisht Edmond Spaho dhe Petrit Vasili, Arta Marku është paditur për largim të paligjshëm të prokurorëve që hetojnë ish-ministrin e Brendshëm Saimir Tahiri, me qëllim mbylljen e hetimit ndaj tij.
Në kallëzim thuhet se “Arta Marku ka ndërmarrë veprime aktive që kanë shkaktuar pasoja të rënda për funksionimin e organit të prokurorisë”.
Gjithashtu, ish-kryeprokuroja është paditur edhe për faktin se kishte kualifikuar Bujar Sheshin si kandidat për në Këshillin e Lartë të Prokurorisë, pa marrë më parë një konfirmim nga Autoritetit i Dosjeve në lidhje me pastërtinë e figurës së tij.
