Në këtë kohë kur për rreth një muaj të gjithë ndodhen në shtëpi, do dukej pa sens që dikush të ngjiste shërbimet e tij në mure apo shtylla.
Në mure para karantinës kishim parë shpesh njoftime për shtëpi me qira, për fizioterapi në shtëpi, apo personat që blejnë objekte të vjetra e shërbime të tjera.
Për këto katër javë i vetmi njoftim që është ngjitur në mure është “shesim maska”.
Me sa duket në këtë kohë pandemie globale biznesi i maskave është shumë fitimprurës.
Të gjitha dyqanet online reklamojnë maskat dhe japin promocione të ndryshme. Por tani që fasha orare e liridaljes është rritur, bizneset kanë zgjedhur të ngjisin në shtylla dhe mure njoftimin për maskat që ofrojnë.
Çmimi i një maske normale në vendin tonë shkon nga 100 deri në 1000 lekë. Kujtojmë këtu që mjekët nuk këshillojnë që ato të mbahen më shumë se 2-3 orë. Me këto çmimet që ofron tregu shqiptar pjesa më e madhe e popullsisë e ka të pamundur që të mbajë maskë.
