Mosha e tretë ka populluar rrugët e Tiranës sot pasi kryeministri Edi Rama njoftoi dje lirinë e pensionistëve për të dalë nga banesa.
Në të gjitha rrugët e kryeqytetit shohim qytetarë të moshës së tretë që ecin për të bërë ajrosje. Një pjesë e mire e tyre kanë dalë dyshë, veprim që bie në kundërshtim me udhëzimet e qeverisë.
Gazeta Fjala ka shkrepur disa foto ku shihen pensionistët që ecin për ajrosje në rrugët e kryeqytetit.
“Pensionistët mund të dalin, jo për vizita, as për domino, as për ulje të rrezikshme në grup, por për ajrosje dhe ecje deri në orën 11:00 paradite, jo më shumë se me një tjetër pensionist, por duke ruajtur distancën” tha dje Rama.
Ndërkohë, Policia e Shtetit theksoi se efektivët do të jenë pranë tyre për çdo rast nevoje që ata mund të kenë. Ndërkohë, thotë policia, në të gjithë vendin do të vijojnë kontrollet e pandërprera kryesisht në qendrat urbane, për respektimin e karantinës për kategoritë e tjera.
Do të lejohen të qarkullojnë me makinë, të pajisur me autorizim apo në këmbë, në itinerarin shtëpi – punë – shtëpi, pa asnjë ndalesë të gjithë personat që kanë autorizim për të punuar gjatë fundjavës.
Të gjithë të tjerët me karantinën që filloi dje pasdite në orën 17:30 duhet të respektojnë masat kufizuese për të mos dalë nga banesa deri në orën 05:00 të ditës së hënë, duke përjashtuar lëvizjet për emergjencat mjekësore./Fjala.al
