Dr Anthony Fauci ka paralajmëruar botën se nëse trajtimi ndaj koronavirusit nuk fillon sa më parë atëherë do të jetë shumë e vështirë të “zhduket nga planeti ynë”.
Gjatë një interviste për “The Economic Club of Washington D.C”, Fauci ka thënë se është i “pashmangshëm” rikthimi i koronavirusit i cili sipas tij mund të mos zhduket kurrë.
Këto deklarata Fauci i bëri në kohën kur ka filluar të rritet frika se një valë e dytë e koronavirusit mund të përfshijë botën gjatë sezonit të dimrit.
“Në mendjen time është ngulitur ideja se është i pashmangshëm rikthimi i virusit, ose ekzistojnë mundësitë që kurrë të mos zhduket”, ka deklaruar Fauci raporton CNBC, ndërsa shton se “virusi nuk do të zhduket nga planeti ynë”.
Ai është treguar optimist sa i përket programeve studimore që do të sillnin zbulimin dhe prodhimin e një vaksine, edhe pse nuk dha data se sa shpejt mund të arrihet një gjë e tillë.
