Në statutin e Partisë Demokratike përcaktohet se kandidatët e kësaj force politike në zgjedhjet e përgjithshme dhe ato lokale do duhet të kalojnë përmes një procesi primaresh, ku votojnë anëtarët e partisë.
Por kur jemi rreth 4 muaj para datës së zgjedhjeve të përgjithshme, në Partinë Demokratike nuk ka ende asnjë lloj sinjali për zhvillimin e këtij procesi.
Në disa dalje të ndryshme për mediat, kur kryedemokrati, Sali Berisha është pyetur për primaret, ka deklaruar se ato do të zhvillohen, por pa dhënë detaje se kur apo si do të bëhen në kaq pak kohë të mbetur në dispozicion deri në 11 maj.
Deri më tani, në këto 20 vitet e fundit, Partia Demokratike ka zhvilluar dy herë procesin e primareve për të nxjerrë kandidatët për deputetë dhe kryetarë bashkish.
Herën e parë, për zgjedhjet e 25 prillit 2021, procesi i primareve ishte me votë negative për kandidatët më pak të pëlqyer që do të garonin për deputetë dhe u zhvillua në vjeshtën e 2020-ës.
Ndërsa hera e dytë, që përkon edhe me epokën e rikthimit të Sali Berishës në krye të PD, primaret për kandidatët për kryetar bashkie u zhvilluan në fund të nëntorit- në fillim të dhjetorit 2022, gati 6 muaj para datës së zgjedhjeve të 14 majit 2023.
Përcaktimet statuore dhe vullneti i Sali Berishës për primaret janë të pandryshuara, por ajo që nuk është në favorin e PD për këtë proces, është koha, por edhe rreziku i madh që përmes një procesi të tillë, Partia Demokratike të rihapë plagët që ende janë të pafashitura mirë nga përplasja 2-vjeçare që çoi në largimin e Lulzim Bashës dhe disa mbështetësve të tij./ SM
