Në pjesën e dytë në “Open” në Top Channel është folur për kultivimin e kanabisit mjekësor, një propozim i hedhur nga kryeministri Edi Rama. Avokati Adriatik Lapaj dha një shpjegim për dënimet që marrin poseduesit e kanabisit në Shqipëri.
“Kodi Penal i yni është i padrejtë. Në vendin tonë lejohet posedimi dhe konsumini i një sasie të vogël. Por ne bëjmë sikur nuk pihet, shumë e pijnë në Tiranë.
Gjatë vitit 2018 janë dhënë 1376 vite burg për persona që janë kapur me 2-3 cigare hashash. Janë 413 persona të arrestuar me 2-3 cigare hashash, ndërsa në vitin 2018 vetëm 1 kryetar bande është arrestuar. Kodi Penal dënon njësoj atë që ka 2-3 cigare me atë që trafikon 2-3 ton dorgë. Prandaj unë them se duhet ndryshuar Kodi Penal”,- tha Lapaj.
Ndërkohë që kreu i Partisë Agrare Ambientaliste, Agron Duka doli kundër kësaj nisme pasi në këto momente, sipas tij, Shqipëria nuk i plotëson kushtet.
“Nuk plotësohen kushtet, pasi kjo do të bëhet për zgjedhjet që vijnë. Në qoftë se kjo jep një zhvillim në ekonominë shqiptare, unë jam pro. Pra në një të ardhme mund ta legalizojmë, por tani vendi nuk plotëson kushtet. Duhet të jetë Parlamenti i plotë, që debati të zhvillohet siç duhet. Por tani Shqipëria nuk plotëson asnjë kusht për legalizimin e kanabisit”,- tha Duka.
