Çmimet e larta si të shitjes dhe ato të qirave, e kanë bërë të leverdishëm biznesin e parkimit. Koha e kthimit të investimit nga qiraja ditore llogaritet 5 vjet. Koha e kthimit të investimit zgjat deri në 12 vjet me qira mujore.
Rreth 70-80% e blerjeve për parkim, sipas Kryetarit të Shoqatës së Ndërtuesve, Erjon Harizi, bëhen nga vetë banorët e pallateve të reja, që duan të sigurojnë një vend parkimi personal.
“Por një pjesë gjithnjë e më në rritje, sidomos në zonat elitare, përbëhet nga individë ose biznese që i blejnë për qëllime investimi, sidomos për t’i dhënë me qira. Kthimi i investimit nëpërmjet qirasë ditore llogaritet në një afat maksimal prej 5 vitesh. Me qira mujore, kthimi zgjatet në 10-12 vjet”.
Mënyra më e zakonshme është dhënia me qira mujore, sipas z. Harizi, me çmime që variojnë sipas zonës, nga 50 deri në 150 euro/muaj.
Në zona si ish-Blloku, qiratë mujore mund të arrijnë edhe në 200 euro në raste specifike (garazhe të mbuluara me akses të siguruar).
“Ndërsa qiratë ditore janë më pak të zakonshme, por përdoren pranë institucioneve, spitaleve apo zyrave (p.sh., pranë QSUT ose në Rrugën e Elbasanit), me çmime që variojnë nga 300 deri në 800 lekë/ditë, duke siguruar kthim më të shpejtë të investimit.
Nëse një vend parkimi jepet me qira ditore, me një çmim mesatar prej 500 lekësh në ditë dhe është i zënë rreth 20 ditë në muaj, mund të gjenerojë deri në 120,000 lekë të ardhura në vit”, thotë z. Harizi nga Shoqata e Ndërtuesve.
Bashkia e Tiranës pritet të arkëtojë 6,6 milionë euro në 2025 nga tarifa e parkimit
Për vitin 2025, të ardhurat e pritshme për arkëtimin e tarifës së parkimit do të jenë 647 milionë lekë, 6,6 milionë euro, apo rreth 4% më shumë se plani i 2024-s.
Parashikimet për arkëtimin e tarifës në vitet 2025-2027 janë paraqitur në Programin Buxhetor Afatmesëm.
Edhe në dy vitet në vijim, të ardhurat e Bashkisë së Tiranës nga arkëtimi i tarifës së parkimit parashikohen të rriten mesatarisht me 4% nga shtimi i kontratave të reja dhe atyre ekzistuese, në përkatësisht në 665,7 milionë lekë në vitin 2026 dhe 698,9 milionë lekë në vitin 2027.
Parashikimi i të ardhurave të realizuara nga tarifat e parkimit nga “Tirana Parking” për vitet 2025-2027 për parkimin në rrugë është bërë duke marrë parasysh kapacitetin e rrugëve me tarifim, të cilat nga numërimi faktik në terren rezultojnë të jenë 2,305 vende parkimi me pagesë. /Monitor.al
