Disa shtëpi në zonën veriore të Jabalia-s në Gaza thuhet se u shkatërruan në sulmet izraelite të natës.
Sipas mediave të huaja, të paktën 50 palestinezë janë vrarë në një seri sulmesh ajrore izraelite në veri të Gazës, thotë një spital lokal.
Spitali indonezian raportoi se 22 fëmijë dhe 15 gra ishin midis të vdekurve pasi një numër shtëpish në qytetin Jabalia dhe në kampin e refugjatëve u goditën gjatë natës. Një video e shpërndarë në internet dukej se tregonte të paktën një duzinë trupash atje.
Ushtria izraelite tha se po shqyrtonte raportet. Ajo kishte paralajmëruar banorët e Jabalia-s dhe zonave fqinje të evakuoheshin të martën, pasi një grup i armatosur palestinez lëshoi raketa në Izrael, shkruan A2 CNN.
Kjo ndodhi ndërsa shefi i çështjeve humanitare të OKB-së u bëri thirrje anëtarëve të Këshillit të Sigurimit të OKB-së të ndërmarrin veprime për të “parandaluar gjenocidin” në Gaza.
Duke folur në një takim në Nju Jork të martën, Tom Fletcher akuzoi Izraelin për “vendosje të qëllimshme dhe pa turp të kushteve çnjerëzore ndaj civilëve”.
Ai gjithashtu i bëri thirrje Izraelit të heqë bllokadën 10-javore ndaj Gazës dhe kritikoi planin izraelito-amerikan për të marrë përsipër shpërndarjen e ndihmës humanitare duke përdorur kompani private, duke thënë se kjo ishte një “gjethe fiku për dhunë dhe zhvendosje të mëtejshme” të palestinezëve, shkruan A2 CNN.
I dërguari i Izraelit në OKB, Danny Danon, tha se akuzat ishin “të pabaza dhe skandaloze”.
Ai këmbënguli se sistemi ekzistues i ndihmës ishte “i prishur” sepse po përdorej për të ndihmuar përpjekjet e luftës së Hamasit – një akuzë që si OKB-ja ashtu edhe grupi i armatosur e kanë mohuar. m.p.
