Nga Klodian Tomorri/
Pas asaj videos së djeshme, kryeministri, ministri i brendshëm dhe drejtori i policisë mjafton t’i bëjnë vetes një pyetje. Cili prej tyre do të pranonte ta shihte fëmijën e tij minoren të dhunohet barbarisht nga policët e shtetit të vet?
Sigurisht që ata policët duhet të mbajnë përgjegjësitë para ligjit. Por ka dhe një përgjegjësi më të madhe se kaq. Në radhë të parë ata njerëz nuk duhet të ishin kurrë në policinë e shtetit. Ndaj zinxhiri i përgjegjësive shkon më lart se ata, deri në qeveri.
Vendi ka kryeministër, ka ministër të brendshëm dhe drejtor të përgjithshëm në policinë e shtetit. Të tre këta janë njerëz me mandat publik.
I pari është mandatuar nga qytetaret për të ndërtuar një shtet, ku respektohen të drejtat dhe liritë e njeriut. I dyti është emërtesa e tij për të administruar rendin dhe sigurinë publike. Ndërsa i treti, është emërtesa e dy të parëve për të ndërtuar një polici që i shërben qytetareve dhe ligjit.
Në fakt atje tek video, në vend të policisë që i shërben ligjit dhe qytetarëve, duken 4 horra që dhunojnë çdo ligj dhe të drejtë elementare.
Vendoseni vetë në qeveri se kush e ka përgjegjësinë më të madhe dhe se kujt duhet t’i vijë turp për atë shëmtirën.
