Qeveria e Maqedonisë së Veriut ka vendosur të shpërndajë 30 milionë denarë, për viktimat nga zjarri shkatërrues në diskotekën e Koçanit.
Sipas mediave vendase, mësohet se 11.2 milionë denarë u janë dhënë familjeve të cilët dërguan të plagosurit nga zjarri për mjekim jashtë vendit, ndërkohë që çdo pagesë është bërë përmes Kryqit të Kuq nga mjetet e mbledhura përmes linjës së hapur të donacioneve.
“Për këtë situatë, Qeveria e Republikës së Maqedonisë reagoi shumë shpejt. Për viktimat janë siguruar 30 milionë denarë buxheti dhe deri më tani janë paguar 11.2 milionë denarë për të lënduarit që u dërguan për mjekim jashtë vendit.
Përmes Kryqit të Kuq janë mbledhur mbi 100 milionë denarë, aktivitet që u realizua në koordinim me Qeverinë dhe ishte mënyra e vetme më shpejt e mundshme për mbledhjen e mjeteve financiare dhe për t’u ndihmuar familjeve të viktimave.
Kjo ishte arsyeja pse ne kemi zhvilluar dy procedura, njëra prej të cilave ishte me Kryqin e Kuq, ku të gjithë ne si funksionarë dhe deputetë nga shumica parlamentare, por edhe nga opozita kemi dhuruar”, tha ministrja e Financave, Gordana Dimitrieska-Koçoska në seancën parlamentare kushtuar pyetjeve të deputetëve.
Ndër të tjera, Koçoska është shprehur se mënyrë shtesë do të sigurohet përkrahje përmes FSSHM-së për mjekimin e të lënduarve të cilët kanë marrë plagë më të rënda, ku mjekimi do të jetë afatgjatë.
Kujtojmë se nga tragjedia e zjarrit në diskotekën e Koçanit humbën jetën 59 persona dhe mbetën të plagosur mbi 150 persona, të cilët u dërguan për trajtim jashtë vendit./e.t
