Këshilli i Sigurimit i Kombeve të Bashkuara mbajti një takim urgjent pasi SHBA-të kryen një sulm me bomba në centralet bërthamore të Iranit. Të gjitha palët bënë thirrje për një zgjidhje diplomatike dhe për një ulje të tensioneve për çështjen bërthamore të Iranit.
Sekretari i Përgjithshëm i OKB-së, Antonio Guterres, u tha të pranishmëve se sulmet masive të Shteteve të Bashkuara kundër objekteve bërthamore të Iranit, vetëm sa rrisin rrezikun e një lufte botërore dhe “dëmtojnë rendin ndërkombëtar”.
Shefi i OKB-së u bëri thirrje palëve që të lënë armët dhe të mundësojnë që diplomacia të mbizotërojë në rajon. Drejtori i Përgjithshëm i Agjencisë Ndërkombëtare të Energjisë Atomike, Rafael Grossi, tha se regjimi global i mospërhapjes bërthamore po përballet me kërcënime të rënda.
Ai vuri në dukje se ushtria amerikane bombardoi tre objekte bërthamore të Iranit dhe se dëmet e lidhura me to nuk mund të vlerësohen ende.
Përfaqësuesi i Përhershëm i Kinës në Kombet e Bashkuara, Fu Cong, dënoi Shtetet e Bashkuara për sulmet e tyre ndaj centraleve bërthamore të Iranit.
Por e dërguara e SHBA-së në detyrë, Dorothy Camille Shea, i mbrojti sulmet, duke thënë se Irani kishte penguar negociatat dhe përbënte një kërcënim në rritje.
Ambasadori i Rusisë, Vassily Nebenzia, kritikoi ashpër SHBA-në për anashkalimin e diplomacisë ndërkombëtare, duke paralajmëruar se Uashingtoni kishte “hapur kutinë e Pandorës” dhe kishte rrezikuar ta zhyste botën në një krizë bërthamore.
Rusia, Kina dhe Pakistani qarkulluan një projekt-rezolutë gjatë takimit, duke bërë thirrje për një armëpushim të menjëhershëm dhe pa kushte në Lindjen e Mesme.
Teksti, i parë nga Reuters, dënon gjithashtu sulmet ndaj objekteve bërthamore iraniane, por nuk përmend Shtetet e Bashkuara ose Izraelin. Diplomatët thanë se anëtarëve u është kërkuar të paraqesin komentet e tyre deri të hënën në mbrëmje, megjithëse mbetet e paqartë se kur ajo mund të vihet në votim./E.T
