Më 13 qershor, ndërsa Izraeli filloi të bombardonte lokacionet bërthamore dhe të vriste udhëheqësit ushtarakë të Iranit, agjentët e Mossadit po kryenin një fushatë paralele kundër lidhjeve të tjera në zinxhirin komandues të Pasdaran. Gazeta Washington Post zbulon një regjistrim të bërë në orët e para të sulmit izraelit ndaj Teheranit, si pjesë e operacionit të gjerë të inteligjencës të kryer nga shteti hebre.
Mediat ndërkombëtare raportojnë se operacioni i inteligjencës, i planifikuar prej vitesh, kontribuoi në mënyrë vendimtare në bastisjet e shtetit hebraik, duke ofruar informacion shumë të saktë. Provë e këtij “suksesi” jepet nga një telefonatë e regjistruar në orët e para të sulmeve dhe e bërë publike nga Washington Post. Në audio, një agjent i Mossadit dëgjohet duke folur me një gjeneral iranian, emri i të cilit nuk dihet.
Çfarë i tha agjenti izraelit gjeneralit iranian?
Qëllimi i shërbimeve izraelite ishte të kërcënonin nivelet më të ulëta të ushtrisë iraniane. Në regjistrim, një agjent sekret anonim dëgjohet duke i thënë gjeneralit iranian në persisht se ai ka 12 orë për t’u arratisur me familjen e tij përpara se Izraeli ta vrasë. “Mund t’ju paralajmëroj tani: keni 12 orë për t’u arratisur me gruan dhe djalin tuaj. Përndryshe, jeni në listën tonë. Paqja qoftë mbi ju, gjeneral. Unë jam një nga ata që i dërguan kolegët tuaj në ferr. Po ju telefonoj për t’ju paralajmëruar, për t’ju dhënë një shans: largohuni, shkëputuni. Përndryshe, do të jeni një nga objektivat tanë të ardhshëm. Do t’ju vrasim ju, gruan dhe djalin tuaj. A më kuptoni saktë?”
“Ne jemi ata që i dërguam gjeneralët iranianë në ferr”
Në fillim të telefonatës, agjenti izraelit e identifikon veten si nga një vend që “i dërgoi në ferr Salamin, Bagheri-n dhe Shamkhani-n”, duke iu referuar tre zyrtarëve të lartë iranianë të vrarë në fillim të fushatës. Ai po i referohej Hossein Salamit, kreut të Korpusit të Gardës Revolucionare Islamike, Gjeneral Major Mohammad Bagheri-t, shefit ushtarak të Iranit, dhe Ali Shamkhani-t, një këshilltar i lartë i Ajatollah Ali Khameneit.
Agjenti izraelit i kërkoi gjeneralit iranian të xhironte video kundër regjimit
Gjatë telefonatës, agjenti i kërkoi gjithashtu gjeneralit të xhironte një video duke denoncuar regjimin shiit. Dhe se ai duhej të deklaronte me një pamje nga afër: “Ne jemi distancuar nga kjo qeveri dhe nuk jemi të gatshëm të sakrifikojmë jetën tonë për njerëzit që kanë shkatërruar vendin tonë për 46 vjet”. Zyrtari izraelit më pas i kërkoi gjeneralit iranian ta dërgonte videon nëpërmjet platformës së mesazheve të koduara Telegram. Në fund, është e paqartë nëse videoja është realizuar apo është dërguar.
Misioni paralel i Mossadit: Kërcënimi i pasardhësve të udhëheqësve të Pasdaranëve
Gazeta amerikane nuk e identifikoi gjeneralin iranian, i cili besohet të jetë gjallë, dhe ia heshti zërin gjatë telefonatës. Megjithatë, ajo raportoi se audioja ishte një nga disa telefonata drejtuar zyrtarëve të lartë të IRGC-së në fillim të sulmeve të Izraelit ndaj programit bërthamor dhe infrastrukturës ushtarake të Iranit, me qëllim destabilizimin e regjimit të vendit dhe kërcënimin e zyrtarëve të nivelit të dytë dhe të tretë që do të zëvendësonin udhëheqësit e vrarë.
Agjentë izraelitë të infiltruar në Iran
Operacioni i inteligjencës izraelite përfshinte grupe agjentësh të infiltruar në Iran dhe armë të sjella fshehurazi në vend dhe të fshehura deri në sulmet. Përveç vrasjes së krerëve të Gardës Revolucionare , shteti hebraik vrau gjithashtu shumë nga shkencëtarët kryesorë bërthamorë të Iranit. Disa ditë më parë, Pasdaran ekzekutoi një person të arrestuar në vitin 2023 për bashkëpunim me Mossadin. /E.T
