Alarmante paraqitet situata në fshatin Hoshtimë të Vlorës, ku pasditen e kësaj të diele u aktivizua një vatër zjarri.
Prej orësh tanimë, zjarrfikësit janë duke “luftuar” me flakët të cilat të favorizuara nga era po përhapen frikshëm dhe po marrin para gjithçka që u del.
Burime për mediat bëjnë me dije se varrezat e fshatit janë djegur plotësisht, ndërkohë që zjarri është shtrirë deri te banesat e qytetarë, duke rrezikuar kështu seriozisht jetën e banorëve dhe pronat e tyre.
I favorizuar nga temperaturat e larta dhe erërat e forta, zjarri ka përparuar në drejtim të fshatrave Kërkovë dhe Bestrovë, ndërkohë që policia ka bërë të mundur evakuimin e qytetarëve si dhe banorët kanë zhvendosur bagëtitë nga stallat.
Në vendin e ngjarjes ndodhen katër zjarrfikëse, helikopteri i FNSH-së, i cili po hedh ujë nga largt si dhe efektivët e Forcave të Ndërhyrjes së Shpejtë të cilët u kanë ardhur në ndihmë policëve si dhe zjarrfikësve.
Ndërkohë, për mediat ka folur një banor i fshatit i cili me lot në sy ka deklaruar se dëmi është shumë i madh.
“U thaftë ajo dorë që ka vënë zjarr dhe dëm I madh na u bë. Të gjitha pyjet u shuan. Po rrezikohen shtëpitë… e të gjitha, ullinjtë po digjen. Varrezat e dogjën, me selvi, e me të gjitha. Është bërë dëm i madh”, tha ai. m.p.
