Kryeministri në detyrë i Kosovës, Albin Kurti ka zhvilluar sot një bisedë telefonike me kryetarin e Presidencës së Bosnje dhe Hercegovinës, Šefik Džaferović.
Ata kanë diskutuar lidhur me situatën nga koronavirusi, duke i komunikuar njëri-tjetrit masat që qeveritë e dy vendeve kanë ndërmarrë, në luftimin dhe menaxhimin e përhapjes së pandemisë, shkruajnë mediat kosovare.
Gjithashtu raportohet të jetë diskutuar edhe për marrëdhëniet bilaterale, lëvizjes së lirë të mallrave dhe të personave në mes dy shteteve.
“Me këtë rast, Džaferović falënderoi Kryeministrin në detyrë Kurti për vendimin për largimin e tarifës 100% ndaj mallrave nga Bosnjë dhe Hercegovina.
Kryeministri në detyrë Kurti tha se Republika e Kosovës nuk duhet ta trajtojë dhe nuk do ta trajtojë njësoj Bosnjën dhe Hercegovinën sikurse Serbinë.
Të dy konstatuan se kërcënimi më i madh me të cilin përballemi në dy vendet është lloji i politikës që nuk pati sukses gjatë luftës në vitet 90-ta, dhe se ideja e shkëmbimit territorial në mes Kosovës dhe Serbisë është e rrezikshme pasi e njëjta na kthen në vitet e 90-ta”, thuhet në njoftimin e kryeministrisë.
Kurti është shprehur më herët se taksa me Bosnje Hercegovinën duhet të hiqet, duke theksuar faktin se ajo nuk duhet të trajtohet njëlloj me Serbinë.
