“Ia dolëm,” thotë Mariah Carey, pasi transmetimet, tanimë, e rendisin si hitin sezonal që mban vendin e parë.
Ndoshta është kënga më e dashur e Krishtlindjes, euforike dhe me tinguj mbresëlënës, por “All I Want for Christmas Is You” e Mariah Carey nuk kishte arritur kurrë vendin e parë në Shtetet e Bashkuara të Amerikës deri tani.
Kur u lancua në 1994, rregullat e klasifikimit të muzikës amerikane atëkohë nënkuptonin se nuk mund të garonte si “single”. Riklasifikimet e mëvonshme e konsideruan si një këngë të pavarur në vitin 2000, ndërsa më në fund pas 25 vjetësh arriti të marrë vendin e parë në 2019.
“All I Want for Christmas Is You” e Mariah Carey është afër rekordit të The Beatles. Gjithashtu është kënga e parë e Krishtlindjes që kryeson listat e Shteteve të Bashkuara të Amerikës që nga Chipmunk Song (Krishtlindje mos u vono) në 1958.
“Ne ia dolëm,” ka shkruar në Twitter, Mariah Carey, duke shtuar pjesë të një interviste dhënë për New York Times: “Ka të bëjë me atë çka fansat dhe njerëzit që më qëndrojnë pranë, më flasin gjatë gjithë vitit. Nuk kam nevojë për diçka tjetër për të vërtetuar ekzistencën e kësaj kënge. Kam zgjedhur ta këndoj gjithmonë, por në këtë pikë, ndjehem sikur më në fund jam në gjendje edhe ta shijoj. Thjesht i dua vërtet pushimet, e di që janë të mërzitshme, dhe nuk më intereson”.
Mariah Carey ka përfituar nga kohështrirja e transmetimit të këngës, përfshirë edhe listat më të mëdha të spoteve për Krishtlindje nga Spotify, Apple Music dhe të tjerë. Analistët e industrisë së muzikës “Nielsen” shprehen se transmetimi i këngës gjatë periudhës së Krishtlindjes ka shkuar nga 12.6 milion në 2014 në 61 milion në 2016, dhe 185 milion në 2018. Radio amerikane e transmeton pothuajse dyfish në të njëjtën periudhë.
Kështu që kënga ka arritur suksesin e padiskutueshëm
Përgatiti: L.Veizi
Burim: theguardian.com
