Është publikuar draft-opinioni i Komisionit të Venecias në lidhje me emërimet e anëtarëve të Gjykatës Kushtetuese që solli një përplasje mes Parlamentit dhe Presidentit.
Në draft-opinion theksohet se rregulli i radhës aplikohet vetëm në momentin e shpalljes nga kryetari i Gjykatës Kushtetuese të vakancave, pas hapjes së secilit raund të emërimeve.
“Pasi të jenë shpallur vakancat për trupat përkatëse të emërimit, sekuenca nuk kërkon aktivizim deri në raundin tjetër. Sidoqoftë, për sa kohë që mungesa e kandidatëve vazhdon dhe listat përbëhen kryesisht nga të njëjtët kandidatë, në një situatë kur ka emërime që duhen bërë, Presidenti dhe Kuvendi (dhe Gjykata e Lartë, nëse fillon të funksionojë së shpejti) duhet të bien dakord për procedurën që do të ndiqet”, shkruhet në raport.
Komisioni i Venecias, ndër të tjera, shton se është me rëndësi jetike që Shqipëria të plotësojë vakancat në Gjykatën Kushtetuese dhe në Gjykatën e Lartë sa më shpejt të jetë e mundur. Në raport nënvizohet se kriza kushtetuese është pasojë e disa faktorëve, ndërsa rekomandon dialog konstruktiv dhe bashkëpunim mes institucioneve për kalimin e krizës./E.B./Fjala.al
