Vdekja e Jaup Begotaraj, 17 vjeç, teksa punonte për hapjen e një parkimi në zonën e kalasë në Vlorë, ka sjellë reagimin e ashpër të disa organizatave në Shqipëri. I mituri raportohet se punonte pa masat e sigurisë, ndërkohë që nuk figuronte as si i punësuar.
Mësohet se Jaupi ishte djali i vetëm i familjes dhe ishte rritur nga gjyshërit, pasi prindërit i kishte me problem të shëndetit mendor. Kushtet e vëshitra ekonomike e shtynë Jaupin të fillonte që i vogël punën, por punëdhënësit e tij nuk janë angazhuar që ai të ketë kushtet minimale të sigurisë.
Reagimet
Konfederata e Sindikatave të Shqipërisë
“Pasiguria” në punë vret dhe në pandemi shteti hesht !
Një 17 vjeçar në Vlorë ka humbur jetën në një aksident në punë në qytetin e Vlorës për shkak të mungesës së kushteve të sigurisë teknike.
17 vjeçari ka qenë duke punuar në një gropë kur është goditur nga skrepi i një fadrome dhe ka humbu jetën në vend.
Trupi i pajetë ka qëndruar për minuta të tëra, ndërkohë kanë qenë mediat që kanë njoftuar policinë dhe qytetarët.
Në Konfederata e Sindikatave të Shqipërisë i urojmë ngushëllime familjes dhe kërkojmë që policia dhe prokuroria të nisin një hetim.
Ky është një aksident për shkak se drejtuesit e firmës që po kryen punime nuk kanë respektuar kushtet e sigurisë teknike në punë.
Sektori i ndërtimit po konkurron me galeritë e vdekjes minierat sa i përket punëtorëve që humbin jetën në vendin e punës.
Inspektoriati Shtetëror i Punës prej vitesh është në drejtim të paditur dhe siguria e jeta e punëtorit shqiptar është në mëshirë të fatit.
STOP PASISURISË NË PUNË, JETA E PUNËTORIT SHQIPTAR ËSHTË SHENJTË!
Të drejtat e punëtorëve në Shqipëri
“Vrasjet” e punëtorëve në vendin e punës vazhdojnë!
Dje një 17-vjeçar humbi tragjikisht jetën në Vlorë pasi u godit nga skrepi i një fadrome teksa ishte duke punuar për hapjen e një grope që do shërbente për ndërtimin e një parkingu.
Jaup Begotaraj ishte djali i vetëm i familjes, ndërsa ishte rritur nga gjyshërit pasi prindërit i ka me probleme të shëndetit mendor.
I riu së bashku me manovratorin Bujar.Ç punonin në pastrimin e inerteve për hapjen e një parkimi në zonën e kalasë, ndërkohë që fillimisht u fsheh ky fakt dhe u deklarua se adoleshenti shkoi atje për të takuar një shok dhe jo si i punësuar.
Policia e Vlorës ka nisur hetimin për firmën e ndërtimin ku punonte 17 vjeçari ndërsa mësohet se në prangat e policisë ka rënë manovratori dhe tekniku i firmës që mbikqyrte punimet. Po ashtu bëhet me dije se i riu punonte pa siguracione dhe jashtë çdo rregulli ligjor.
Për qeverinë dhe institucionet publike shqiptare jeta e një punëtori vlen më pak se ajo e një qeni. Grykësia e pronarëve të tyre nuk ka kufi.
Prandaj është e domosdoshme që punëtorët të organizohen në sindikata. Jeta dhe të drejtat e tyre nuk mund të varen nga një shtet i korruptuar, por vetëm nga solidariteti mes bashkëvuajtësve.
Pa sindikata nuk ka të ardhme!
Organizata Politike
Dje vdiq në vendin e punës 17-vjeçari Jaup Begotaraj, i goditur nga një vinç. Jaupit, fëmijë me dy prindër të sëmurë e të varfër, iu desh të punonte që në moshë të vogël.
Përveç trishtimit për jetën e humbur, të skandalizon fakti se Policia e Shtetit mohon që ai të ketë qenë punëtor, ndërkohë që qytetarët dëshmojnë të kundërtën. Ky nuk është rasti i parë kur policia bashkëpunon me pronarët në krim. Ai evokon vdekjen tragjike të një tjetër 17-vjeçari, Ardit Gjoklajt, në landfillin e Sharrës, ku institucionet shtetërore mbuluan kriminalisht përgjegjësinë e Erion Veliajt dhe pronarit të landfillit.
Të gjithë fëmijët meritojnë mirëqenie, shkollim, sport e arte, ndërkohë që më të varfrit mes tyre ende shtrëngohen të punojnë, madje edhe të vdesin në vendin e punës.
