Federata Shqiptare e Futbollit ka reaguar sot në lidhje me konfirmimin e lojtarit të Bylisit, Eridon Qardakut, pozitiv me koronavirus.
Në një njoftim për mediat, FSHF ka theksuar se ka komunikuar me drejtuesit e klubit në fjalë dhe thekson se janë duke u ndjekur të gjitha protokollet shëndetësore.
Njoftimi i FSHF-së për mediat:
Federata Shqiptare e Futbollit bën me dije se është njohur me rastin e një futbollisti të KF Bylis, i cili pas testeve mjekësore rezultoi pozitiv me COVID 19.
Menjëherë, Federata ka marrë kontakt me drejtuesit e klubit mallakastriot dhe është informuar për situatën e krijuar.
FSHF njofton se janë ndjekur të gjitha protokollet shëndetësore dhe se të gjithë futbollistët dhe stafi i KF Bylis i janë nënshtruar testeve mjekësore për të verifikuar nëse ka pasur përhapje të infeksionit.
Aktualisht, futbollisti i infektuar me COVID 19 është karantinuar sipas rregullave dhe është në gjendje të mirë shëndetësore.
Gjithashtu, pas testeve ka rezultuar se asnjë pjesëtar tjetër i KF Bylis nuk është prekur nga virusi dhe të gjithë gëzojnë shëndet të plotë.
Sektori i Marrëdhënieve me Publikun, FSHF.k.t/Fjala.al/
