Pak ditë më parë këngëtari i njohur Ilir Shaqiri ndau me të gjithë miqtë dhe të afërmit e tij lajmin e trishtë të ndarjes nga jeta të së ëmës.
Kur kanë kaluar 5 ditë nga ajo ditë zie për këngëtarin, Ilir Shaqiri ka një falënderim për të gjithë ata që i qëndruan pranë në këto ditë të vështira dhe ndanë dhimbjen e madhe bashkë me ta.
“Të dashur miq! Në këto ditë dhembjeje për mua dhe familjen time, shpreh mirënjohjet dhe falënderimet tona për ju, që patët mirësinë të merrni pak nga pak nga dhembja jonë!
Dhembja për ne është e madhe, por edhe ngushëllimi juaj për ne është i madh. Them kështu sepse nënat tona, të frymëzuara nga urtësia popullore, na e kanë përsëritur sa e sa herë se: Krahët e njeriut janë miqtë, ata që të bëjnë të ngrihesh, ata që s’të lënë që të biesh”, shkruan këngëtari.
Më tej ai bën një përshkrim për të ëmën duke treguar se, “Nëna ime u lind 4 tetor, 1939, në Vitak të Drenicës, mbesë e Ahmetajve të Radishevës, u martua në Burojë dhe krijoi një familje të madhe. U nda nga jeta me 13 qershor, 2020, duke lënë pas shtëpinë plot, me dëshirat e saj të plotësuara.
Ne pasardhësit e saj, për sa kohë të jemi në këtë botë, do ta kujtojmë dashurinë e saj, udhëzimet e saj, porosinë e përhershme të saj, se: Njerëzit, nivelet e tyre i renditë edukimi, shkolla dhe puna e tyre në shërbim të së mirës, në shërbim të së vërtetës.
Ky është ngushëllim i madh për ne: bijtë e saj, bijën e saj, rejat e saj, nipërit e stërnipërit e saj, mbesat e stërmbesat e saj.
Në emër të 42 trashëgimtarëve të saj, mirënjohje pafund juve miq të nderuar të familjes sonë, Shaqiri!”/Bl.Ba/Fjala.al
