I dyshuari kryesor për vrasjen e dy biznesmenëve Paulin Gjergji dhe Bujar Lika (Hasani) është marrë në pyetje nga policia lidhur me krimin e ndodhur në Laç më 30 maj.
30-vjeçari Eduart Lamaj ka thënë versionin e tij të ngjarjes, duke deklaruar se nuk ka pasur konflikt me viktimat, por me pronarin e hotelit ku u zhvillua ngjarja, Ilir Alammanin, për një borxh për pazare droge.
“Kemi punuar të dy në Itali me Ilirjan Allamanin, pronari i lokalit ku ndodhi vrasja. Ia kam kërkuar disa herë lekët, por nuk mi ka dhënë, madje jemi sharë dhe më ka ofenduar. Sapo kam hyrë në lokal jam qëlluar nga një person që nuk e njihja”, ka thënë Lamaj.
Ai ka treguar se është rrëzuar pas plagosjes dhe ka qëlluar për vetëmbrojtje, ndërsa ka thirrur për ndihmë.
Eduart Lamaj u kap mbrëmjen e së hënës, i plagosur duke u mjekuar ilegalisht në një spital privat në Tiranë.
Si bashkëpunëtorë të Lamaj janë shpallur në kërkim 33- vjeçari Ilir Xhepaj (Likaj), 31- vjeçari Elson Alija, i njohur ndryshe si Oltion Vlashi dhe 21 vjeçari Klaudio Perkola.
Në vijim të hetimeve policia ka sekuestruar dy makina, të cilat kanë shërbyer për kryerjen e krimit dhe për largimin nga vendi i ngjarjes, një ‘Volksëagen’ me targa AA505UG si dhe një makinë ‘Land Rover’, mjet me të cilin Lamaj u transportua drejt klinikës private.
Bëhet me dije se 33-vjeçari Ilir Xhepaj rezulton në kërkim, për një tjetër plagosje të ndodhur po në muajin maj./Bl.Ba/Fjala.al
