Drejtori i Arkivave, Ardit Bido ka reaguar për zjarrin e rënë në godinën e ISH Arkivit Shtetëror Vendor në Kukës.
Në një postim në ‘Facebook’, Bido shprehet se nga ky zjarr nuk ka dëmtime të botimeve arkivore, ndërsa ka theksuar se para dy vitesh kur u ndërmor reforma për moslënien e asnjë dokumenti arkivor në godina që nuk kishin kushtet e ruajtjes hasën në kundërshtime.
Megjithatë sipas tij, falë asaj reforme nga zjarri i rënë ditën e djeshme për fat të mirë nuk ka dëmtime.
Postimi i plotë:
Asnjë zjarr në arkiva nuk ka rënë ?
Kur na çmendën pse i mblodhëm arkivat në godina arkivore e u thoshim “zjarri” nuk na besonin ?
Sqarim:
Zjarri i rënë në Kukës është në godinën e ISH Arkivit Shtetëror Vendor. ASHV Kukës gjendet i plotë e i paprekur në godinën e ndërtuar enkas për arkiv në qytetin e Rrëshenit. Para dy vitesh kur u ndërmor kjo reformë, ishim të qartë se asnjë dokument arkivor nuk mund të lihej në godina që nuk kishin kushtet e ruajtjes. Ndaj, duam të sqarojmë se lajmi i rënies së zjarrit në ish godinën e Kukësit nuk cenon asnjë dokument, që prej vitesh ruhet sipas standardeve arkivore, siç i ka hije arkivave shqiptare! Ai lajm fakton se lëvizja e paprecedentë e grumbullimit të arkivave vendore në godina mirfilltazi arkivore ishte e domosdoshme e fatmirësisht u krye në kohën e duhur.
Në godinën në Kukës kishin mbetur vetëm materiale për jashtë përdorimit, si disa vëllime të mykura të veprave të Enver Hoxhës apo dokumentacion i mykur masiv kontabël; që prisnin procedurën e asgjesimit.
Ndërkaq, mbi shkaqet fizike të rënies së zjarrit do të lajmëroheni në vijim.ka.ta/Fjala.al/
