Presidenti turk Erdogan ka akuzuar shtetet e fuqishme të botës se nuk e kanë mbështetur planin e tij për krijimin e “zonës së sigurt” në veri të Sirisë, ku ai planifikon që të vendosen rreth 1 milionë refugjatë sirianë. Deklaratën kreu i qeverisë turke e tha në Forumin Global të Refugjatëve që po zhvillohet në Gjenevë prej 17 dhjetorit.
“Edhe vendet që ne i konsiderojmë si më të fuqishmet dhe më të respektuarit nuk i janë përgjigjur akoma thirrjes sonë për një zonë të sigurt”- u shpreh presidenti Erdogan para gazetarëve në Gjenevë.
“Nëse kemi sukses, kjo do të hyjë si shembull në histori. Ata do të thonë se ne kemi krijuar këtë qytet ose qytete për refugjatët. Kjo është me të vërtetë e rëndësishme për ne. Projekti ynë është i shkëlqyeshëm”,- tha ndër të tjera presidenti turk.
Në forumin Global për Refugjatët, Erdogan tha se vendi i tij shpenzoi 40 miliardë dollarë për t’u kujdesur për rreth 3.7 milionë refugjatë sirianë të akomoduar në Turqi. Ai përsëriti akuzën ndaj Bashkimit Evropian se nuk arriti të plotësojë gjysmën e shumës prej gati gjashtë miliardë eurove që i premtoi Turqisë për të ndihmuar refugjatë sirianë./Fjala.al/
