Këshilli i Lartë i Prokurorisë reagoi sot pas atentatit me eksploziv ndaj automjetit të prokurorit të Vlorës Ablert Kuliçi. KLP e konsideron si sulm të shenjestruar ndaj prokurorit për shkak të funksionit të tij.
“Pa dashur të paragjykojmë përfundimet e hetimit, të cilat i presim me padurim, ajo që ka ndodhur sot në Vlorë duket si një sulm i shënjestruar ndaj prokurorit për shkak të funksionit të tij. Si i tillë, ky sulm përbën një akt të papranueshëm që synon të intimidojë prokurorin dhe të cenojë mirëfunksionimin e sistemit të drejtësisë penale në luftën kundër krimit”-shprehet në reagim e saj KLP. Më tej mbajnë qëndrim të ashpër duke e cilësuar si një “atentat terrorist” dhe shprehur mbështetjen për prokurorin dhe familjn e tij.
“Këshilli i Lartë i Prokurorisë e konsideron çdo sulm kundër prokurorëve si një atentat terrorist ndaj sistemit të drejtësisë penale, rendit onë juridik, vlerave tona shoqërore dhe mënyrës tonë të jetesës. Në ushtrim të përgjegjësive tona kushtetuese për mbrojtjen e prokurorëve, në zbatim të ligjit “Për statusin e gjyqtarëve dhe prokurorëve në Republikën e Shqipërisë“, Këshilli do t’i sigurojë prokurorit Kuliçi dhe familjes së tij mbrojtje të posaçme”-thuhet më tej.
Ngjarja është cilësuar mjaft e rëndë dhe nga hetimet paraprake dyshohet se atentati mund të ketë lidhje me detyrën e prokurotit. Aktualisht janë marrë në shqyrtim të gjithë dosjet që ka në hetim Kuliçi, për të ngushtuar edhe pistën e dyshimeve. Më herët për ngjarjen e rëndë reagoi edhe kryeprokurori Olsian Çela dhe Shoqata e Gjyqtarëve të Shqipërisë.
