Tirana ka triumfuar me rezultatin 2-1 sot ndaj Laçit ne fushën e këtij të fundit, ku kryeqytetasit kanë arritur të marrin trepikëshin falë një dopiete të talentit Ernest Muçi.
Sfida e mbajtur në Laç mes vendasve të Armando Cungut dhe Tiranës, ishte e vlefshme për javën e 17-të të Kategorisë Superiore, ku skuadra kryeqytetase ia doli t’i mposhtë me përmbysje 2-1 kurbinasit.
Kjo falë dy golave të talentit Ernest Muçi, i cili ka qenë edhe lojtari më në formë sot për kryeqytetasit. Mbrojtësi Ignjatov në minutën e 28-të, kaloi vendasit në avantazh, ndërkohë që golat e Muçit në minutat 30-të dhe 78-të bënë të pavlefshëm golin e mbrojtësit serb.
Triumfi në transfertë përballë Laçit ishte mbyllja më e bukur që mund ti bënin këtij viti, një fitore me përmbysje që mban kryeqytetit në garën për titull.
Për Tiranën, kjo ishte fitorja e tretë radhazi për ekipin që ndryshe njihet edhe si ai i 24 herë kampionëve të vendit. Tirana tashmë është ngjitur në ventin e tretë në kuotën e 28 pikëve, ndërsa Laçi zbret një vend më poshtë në kuotën e 25 pikëve./Fjala.al/
