Tajfuni “Phanfone” goditi sot qendrën e arkipelagut të Filipineve, duke u shkatërruar festën e Krishtlindjeve filipinezëve. Autoritetet u kërkuan mijëra njerëzve të evakuojnë shtëpitë e tyre, si pasojë e situatës së rënduar.
Tajfuni me një shpejtësi prej 150 km/orë nuk ka shkaktuar viktima, por vetëm dëme materiale. Autoritetet shpjeguan se, shumë familjarë kanë refuzuar evakuimin edhe pse situata mund të përkeqësohet nga rrëshqitjet e tokës.
“Disa familje janë në mëdyshje të evakuohen, sepse dëshirojnë të festojnë Krishtlindjet në shtëpi, por zyrtarët lokalë do t’i detyrojnë ata të largohen, nëse refuzojnë të zbatojnë paralajmërimet tona”,- tha një zyrtar i mbrojtjes civile.
Ai shpjegoi se evakuimi duhet zbatuar në mënyrë që të evitohen viktimat. Mijëra njerëz gjithashtu kanë mbetur të bllokuar në porte për shkak të përfshirjes nga kjo stuhi.
Më shumë se 21,000 pasagjerë trageti, të cilët u përpoqën të ktheheshin në shtëpi gjatë festave të Krishtlindjes, u bllokuan në porte. Pritet që qyteti i Borongon, i vendosur në bregdetin lindor të ishullit të Samar të jetë goditja e radhës e fortë./Fajla.al/
