Federatat e futbollit të Shqipërisë e të Kosovës, të kryesuara nga presidentët Armand Duka dhe Agim Ademi, po planifikojnë për një kupë të përbashkët ku do të konkurrojnë ekipet e të dyja shteteve dhe në fund fituesi do të ketë mundësinë e pjesëmarrjes në Ligën e Europës.
Duka dhe Ademi kanë rënë dakord që kjo kupë të quhet “Nënë Tereza” dhe sipas tyre ky kompeticion do ketë si qëllim afrimin e sportit të dy vendeve.
Në një komunikim me mediet kreu i Federatës së Futbollit të Kosovës ka thënë se qeveritë do të krijojnë një fond të përbashkët për këtë kompeticion dhe krahas shpërblimit që do marrë nga federata, fituesi do vlerësohet edhe nga qeveria.
“Kjo kupë do të jetë masive dhe do të zhvillohet gjatë gjithë vitit. Mund të luhen ndeshjet në mesjavë të mërkurën ose të enjten kur nuk ka ndeshje kampionati. Projekti do të jetë i përbashkët edhe me qeveritë tona. Do të krijohet një fond i posaçëm nga të dyja qeveritë dhe nga federatat. Krahas shpërblimit që do ta marrë fituesi nga federatat, do ta ketë edhe një shpërblim shtesë nga qeveritë. Kjo kupë do të njihet si kupa ‘Nëna Terezë’”-tha Ademi.
Në komunikimin tij Ademi ka shtuar se ky propozim është dorëzuar edhe në UEFA dhe po pritet përgjigja e qeverisë së futbollit.
“Ne e kemi dorëzuar në UEFA projektin dhe ende nuk kemi marrë përgjigje. Vitin tjetër do të mbajmë mbledhje për këtë çështje dhe do ta diskutojmë. Kjo çështje i takon më shumë presidentit Armand Duka, që është anëtar i Komitetit Ekzekutiv të UEFA. Në kuadër të kësaj i takon atij me kompetencë ta përcjellë këtë çështje. Duka është edhe përgjegjës i federatave të regjioneve si Kosovës, Maqedonisë së Veriut, Malit të Zi dhe Serbisë”.-deklaroi ai.
Ndër të tjera në kërkesën e bërë ndaj UEFA-s krerët e federatave kanë kërkuar njohjen e kësaj kupe në garat e fituesve në të gjithë botën.
“Kemi kërkuar nga UEFA që fituesi i kësaj kupe të jetë i pranuar në garat e fituesve të kupave, që janë jashtë kupës së shtetit. Spanja, bie fjala, e ka Kupën e Mbretit dhe ky eveniment njihet nga UEFA. Fituesi i Kupës së Mbretit shkon në UEFA dhe ne e synojmë një gjë të tillë. Krahas kampionit të Kosovës, vendit të dytë dhe fituesit të kupës së shtetit, nga Kosova ose nga Shqipëria, do të jetë një skuadër tjetër skuadër pjesëmarrëse në Evropë që shkon nga kjo kupë”,-tha për mediet Agim Ademi./Përgatiti: Fjala.al/
