Presidenti i Republikës, Ilir Meta, drekën e Krishtlindjes sot e ka kaluar me familjet e prekura nga tërmeti. “Uroj që Krishtlindjet e tjera t’i kremtojmë si gjithmonë nën një atmosferë festive dhe gjithëpërfshirëse!”,- ka uruar Meta nga Mamurrasi.
Dreka e Krishtlindjes ishte shtruar nga Famullia “Zoja e Ngritur në Qiell”, për familjet e prekura nga tërmeti në Mamurras.
Në praninë e Arqipeshkvit Metropolitan Tiranë-Durrës, Imzot George Frendo, primarit të famullisë Dom Altin Shabani dhe murgeshave që shërbejnë në këtë zonë që prej vitit 1992.
“Në këtë ditë të bekuar të Krishtlindjes, duhet të jemi në radhë të parë më pranë atyre që kanë nevojë për më shumë kujdes, dashuri dhe përfshirje sociale.
Këto Krishlindje na gjetën në vështirësi për shkak të pasojave që la tërmeti tragjik i 26 nëntorit dhe ju e ndjetë edhe më fort se sa shumë zona të tjera, dhe për fat të keq patët më shumë dëme e humbje.
Megjithatë është një moment për të shpresuar, për të gëzuar, për të punuar të gjithë së bashku, në mënyrë që Krishtlindjet e tjera t’i kremtojmë si gjithmonë nën një atmosferë festive dhe gjithëpërfshirëse!
Edhe një herë faleminderit Imzot Frendos për ftesën e tij! Ju uroj gëzuar këto Krishtlindje dhe Vitin e Ri! Le të jenë një ogur i mirë për ju si dhe për të gjithë vendin tonë!”,- ka përfunduar mesazhin e tij Presidenti Meta./Fjala.al/
https://www.youtube.com/watch?v=pQYxT3Z7czI
