Ministrja e Infrastrukturës dhe Energjisë, Belinda Balluku ka folur për një nga hallet më të mëdha të korrupsionit, me të cilin ndeshmi kur kemi të bëjmë me sportelet e ndryshme. Ajo u shpreh se ky problem do të evitohet falë dixhitalizimin total të shërbimeve.
Sipas saj pothuajse 91% e shërbimeve të cilat do të kalojnë on-line do të ndikojnë në uljen e korrupsionit duke hequr çdo lloj kontakti të qytetarit me sportelet.
“Sot kam pasur nderin të lançoj e para nga të gjithë ministrat, kalimin online të më shumë se 90 për qind të shërbimeve, më saktë 91 për qind të tyre. Kjo do të ndikojë në uljen e korrupsionit, duke hequr çdo lloj kontakti të qytetarit me sportelet. Është një proces i vështirë që do të kërkojë impenjimin e të gjithëve. Vetë kryeministri e ka thënë se do të kërkojë impenjimin e çdo ministri në këtë nismë.
Tashmë ky është një proces që ka nisur dhe nuk ka kthim pas. Do të na duhet që fillimisht të ndihmojmë qytetarët që nuk kanë akses ose mundësinë për të përdorur internetin. Në të gjitha sportelet ku sot ofrohen shërbimet, do të jenë djem dhe vajza që do të ndihmojnë.
E kemi provuar me platformën e bashkëqeverisjes, dhe me gjithë mosbesimin e fillimit, tani jo vetëm që e përdorin të gjithë, por edhe e preferojnë më shumë”, – tha ministrja në studion e Euronews. /Fjala.al
