Fshati “Piobbico” njihet si vendi i njerzve të shëmtuar. Ai është i vendosur në një luginë mes Apenineve dhe detit Adriatik në Italinë Qëndrore, dhe është një rajon tipik mesdhetar, me ndërtesa gri dhe pyje të shumtë.
Por në këtë fshat të bie në sy kontrasti i bukurisë së fshatit, me shëmtinë e banorëve që jetojnë aty. Që prej vitit 1879, në fshatin me 2000 banorë, ka ekzistuar “Club dei Brutti” (Klubi i të shëmtuarve), një shoqatë, anëtarët e të cilës besojnë se “një person nuk është ai që duket së jashtmi”.
Sot, e njohur si “Shoqata Botërore e Njerëzve të Shëmtuar”, klubi numëron më shumë se 30,000 anëtarë nga 25 vende të botës. “Club Dei Brutti” fillimisht u konceptua si një vend që do t’u shërbente grave beqare të qytetit, por më pas u shndërrua në një tjetër dimension.
Qëllimi i klubit ishte që t’u kujtonte njerëzve se bukuria fizike është e parëndësishme. Sot është mjaft e lehtë për t’u bërë pjesë e tij. Anëtarët e vjetër duhet thjesht të gjykojnë pamjen e atyre që kërkojnë të bëhen pjesë.
Pasi shqyrtojnë, e përcaktojnë pamjen fizike nga “e papërcaktuar”, në “jashtëzakonisht e shëmtuar”. Duhet thënë që anëtarët e klubit nuk kanë domosdoshmërisht probleme estetike – qëllimi i tyre është festimi për bukurinë e brendshme.
Të dielën e parë të shtatorit, njerëzit nga e gjitha bota mblidhen në Piobbico për të marrë pjesë në Festivalin Vjetor të Njerëzve të Shëmtuar, ku anëtarët zgjedhin presidentin.
Të gjithë hanë tartuf me miell misri dhe makarona. Në fund të fundit, ajo që ka rëndësi është të mbetesh original./Fjala.al/Përgatiti: Kamela Liko/
